Fransiyada parashyutchilar maktabiga qarashli samolyot qulashi oqibatida 11 kishi halok bo‘ldi

Mahalliy OAVning xabariga ko‘ra, parashyutchilar maktabiga qarashli samolyot Nansi-Essey aerodromidan havoga ko‘tarilgan va savdo markazi yaqinidagi hududda qulab tushgan.

Fransiya transport vaziri Filipp Tabaro ichki ishlar vaziri Loran Nunyyes bilan birga “dahshatli fojia yuz bergan” joyga ketayotganini ma’lum qildi.

AFP agentligining ma’lumot berishicha, Mert-va-Mozel sharqiy departamenti prefekti Iv Segi hodisa oqibatida mahalliy aholi orasida qurbonlar yo‘qligini aytgan.

“Samolyot aerodromdan uncha uzoqda bo‘lmagan yashash majmuasi yaqinida deyarli vertikal holatda qulagan”, — dedi Segi BFM telekanaliga bergan intervyusida.

Uning so‘zlariga ko‘ra, halokat joyiga «salmoqli resurslar», jumladan 25 avtomobil va 50 nafar o‘t o‘chiruvchi yuborilgan.

“Bundan tashqari, barcha politsiya bo‘linmalari hamda fuqaro mudofaasi xizmati xodimlari safarbar qilindi. Hozirda surishtiruv olib boradigan sud ekspertlari guruhini kutmoqdamiz”, dedi u.

Aerodrom prezidenti Fransua Pelissyye ushbu voqeani «ulkan fojia» deb atadi va halok bo‘lganlarning ayrimlariga sovg‘a sifatida parashyutdan sakrash imkoniyati berilganini aytdi.

Tomblen meri Erve Feron samolyot veloyo‘lakka qulaganini ma’lum qildi. 

Mahalliy hokimiyatning bildirishicha, samolyot qulagan vaqtda halok bo‘lganlarning yaqinlari aerodromda bo‘lishgan.