O‘zbekistonning goli dunyo e’tirofida va yuk mashinasi rulidagi 7 yoshli bola - mahalliy dayjest

Eldor Shomurodovning goli JCh–2026 guruh bosqichidagi eng chiroyli deb topildi. 7 yoshli bolaga yuk mashinasi boshqaruvini bergan shaxsga chora ko‘rildi. Ro‘yxatga olishda O‘zbekiston aholisi rasmiy statistikadan ko‘proq chiqqaniga izoh berildi. Qashqadaryoda 14 yoshli qizni zo‘rlaganlikda gumonlanib 4 kishi qo‘lga olindi. Kunning muhim yangiliklari bilan tanishtiramiz.

Eldor Shomurodovning goli JCh–2026 guruh bosqichidagi eng chiroyli deb topildi

O‘zbekiston milliy jamoasi sardori Eldor Shomurodovning Kongo DR darvozasiga urgan goli eng chiroyli deb topildi.

Hujumchi o‘yinning 10-daqiqasida jarima maydoniga oshirilgan to‘pga yetib borib, o‘tkir burchak ostida turganiga qaramay, to‘pni parashyut uslubida raqib darvozaboni ustidan oshirib tashlagan va hisobni ochgan edi. FIFA bu vaziyatga shunday baho berdi: «Santimetrigacha aniq hisoblangan va mukammal ijro etilgan bu gol O‘zbekistonning jahon chempionatidagi debyutining eng yorqin lahzasi bo‘ldi».

Shomurodovning goli Lionel Messi, Kilian Mbappe va Vinisius Junior kabi yulduzlar gollaridan o‘zib ketdi.

Ro‘yxatga olishda O‘zbekiston aholisi rasmiy statistikadan ko‘proq chiqqaniga izoh berildi

2026 yil 1 yanvar holatidagi rasmiy statistika bo‘yicha O‘zbekiston aholisi soni 38,2 mln nafar edi. Ammo yanvar-fevral oylarida o‘tkazilgan aholini ro‘yxatga olish natijalari mamlakat nufusining bundan 800 mingga ko‘proqligi va allaqachon 39 milliondan oshganini ko‘rsatdi.

Milliy statistika qo‘mitasi bergan izohga ko‘ra, bunday tafovut normal hisoblanadi va aholi soni sun’iy ravishda oshganini anglatmaydi. Aksincha, ro‘yxatga olish – mamlakatda muayyan sana holatiga haqiqiy yashab turgan aholini to‘liqroq qamrab olishga qaratilgan yirik statistik jarayon hisoblanadi.

Qayd etilishicha, xalqaro tajribada ham aholini ro‘yxatga olish natijalari joriy aholi hisob-kitoblaridan farq qilishi tabiiy holat hisoblanadi.

7 yoshli bolaga yuk mashinasi boshqaruvini bergan shaxsga chora ko‘rildi

Navoiyda Howo yuk mashinasi boshqaruvini 7 yoshli bolaga ishonib topshirgan shaxs aniqlandi. Avvalroq, ijtimoiy tarmoqlarda yosh bola yuk mashinasini boshqarib borayotgani aks etgan videolavha tarqalgan edi.

Qoidabuzarlik yuzasidan tezkorlik bilan surishtiruv harakatlari olib borildi. Jarayonda voqea 2025 yil sentabr oyida bo‘lgani aniqlandi. Ma’lum bo‘lishicha, bolaga yuk mashinasi boshqaruvini qarindoshi bergan.

Karmanalik ushbu shaxsning xatti-harakati va ota-onaning farzandini nazoratsiz qoldirgani yuzasidan ma’muriy bayonnomalar rasmiylashtirildi. Yuk mashinasi esa jarima maydoniga joylashtirildi.

Qashqadaryoda 14 yoshli qizni zo‘rlaganlikda gumonlanib 4 kishi qo‘lga olindi

Yakkabog‘ tumanida 4 nafar yigit 14 yoshli qizni Damas mashinasiga mindirib, dalaga olib borib, zo‘rlaganlikda gumon qilinmoqda.

Yakkabog‘ tumani IIB huzuridagi tergov-tezkor guruhi voqea joyini ko‘zdan kechirib, ish uchun ahamiyatli bo‘lgan ashyo va dalillarni olgan. Sudga oid tibbiy, biologik va psixologik ekspertizalar tayinlangan.

Jinoyat ishi 29 iyun kuni Jinoyat kodeksining 118-moddasi (nomusga tegish) 3-qismi “a” bandiga qayta malakalangan. Gumondorlar Sh.X., D.H., O.N. va D.A. protsessual tartibda ushlangan.