Tramp Oq uyga qaytgach kamida $2 mlrd daromad ko‘rdi. Asosiy boylik – kriptovalutalardan

AQShda 2025 yil uchun majburiy moliyaviy hisobot – deklaratsiyalar e’lon qilindi. Ushbu hujjatlarga ko‘ra, AQSh prezident Donald Tramp Oq uyga qaytgan birinchi yilidanoq aql-bovar qilmas darajada katta daromad ko‘rgan. Jumladan, uning oilasiga tegishli kriptovaluta biznesidan taxminan 1,4 milliard dollar kelib tushgan.

Umuman olganda prezident Tramp kamida 2,2 milliard dollar ishlab topgan. Bu miqdorga uning ulkan boyliklarining boshqa qismlari, masalan, ko‘chmas mulk aktivlari ham kiradi. Ammo, Tramp prezidentlikka qaytishidan oldin, ya’ni butun 2024 yil davomida uning bizneslari 622 million dollar daromad keltirgandi.

Tashqi siyosat va shaxsiy biznes o‘rtasidagi chegaralar

New York Times nashri ushbu moliyaviy hisobot Trampning biznes operatsiyalari ortidagi pardani ochganini tahlil qildi.

Bulardan birinchisi BAA bilan shubhali bitim. Trampning 2025 yildagi eng katta daromadlaridan biri - Birlashgan Arab Amirliklari hukumatiga aloqador bo‘lgan investitsiya firmasi Tramplar oilasining asosiy kriptovaluta kompaniyasi — World Liberty Financial'ning 49% ulushini sotib olganida yuz berdi.

Bu bitim AQSh tashqi siyosati va shaxsiy tadbirkorlik o‘rtasidagi chegaralarni xiralashtirib yubordi. Tez orada BAA yetakchilari Tramp ma’muriyati bilan sun’iy intellektni harakatga keltiruvchi qimmatbaho kompyuter chiplarini eksport qilish bo‘yicha kelishuvga erishdi. Garchi, ba’zi milliy xavfsizlik mulozimlari bu kelishuvga e’tiroz bildirgan bo‘lsa-da. Hujjatda Trampga 200 million dollardan ortiq daromad keltirgan nomi ko‘rsatilmagan investitsiyalar qayd etilgan.

Yana bir daromad manbai xalqaro litsenziyalar. Trump Organization kompaniyasi Trampning nomi va brendini AQSh tashqi siyosiy manfaatlari uchun o‘ta muhim bo‘lgan mamlakatlar, jumladan, Saudiya Arabistoni va Qatardagi ko‘chmas mulklarga litsenziyaladi. Faqat shu ikkita kelishuvning o‘zi o‘tgan yili Trampga 14 million dollardan ortiq daromad keltirgan.

Yaqin Sharqdagi boshqa brending shartnomalari esa o‘tgan yili kamida 35 million dollar daromad keltirdi. Vetnam, Ruminiya, Hindiston, Turkiya va Indoneziyadagi eski va yangi bitimlar umumiy hisobda yana kamida 20 million dollar olib kelgan.

Kriptovaluta — eng asosiy daromad manbai

Bir paytlar kriptovalutani «narkodilerlar va firibgarlarning uyasi» deb ochiqchasiga qoralagan Donald Tramp uchun bugun bu soha eng serdaromad manbaga aylandi.

Xususan, World Liberty ($WLFI) kriptovalutasining har bir sotuvidan 75 foizi Trampning biznes tuzilmasiga o‘tkazilgan. Bu esa token narxi tushsa ham unga daromadni kafolatlagan. Shu bois ushbu kriptovalutadan 2024 yilda atigi 57 mln dollar daromad ko‘rgan Tramp, 2025 yilda 799 million dollar foyda ko‘rgan.

Inauguratsiyadan bir necha kun oldin sotuvga chiqqan TRUMP memcoine esa 2025 yilda prezident oilasiga 636 million dollar foyda keltirdi. Aslida o‘ziga xos tanganing narxi qisqa muddatda keskin ko‘tarilib, keyin 80 foizga qulagandi. Hozirda uning narxi 1,67 dollar atrofida.

NYT'ning yozishicha, prezident Trampning shu paytgacha sir bo‘lib kelgan moliyaviy holati uning biznesidagi yaqqol manfaatlar to‘qnashuvini ko‘rsatadi. Ya’ni, Tramp bir vaqtning o‘zida ham yirik kripto-sanoati ishtirokchisi, ham ushbu soha bo‘yicha eng oliy qarorlar qabul qiluvchi shaxs hisoblanadi.

Oq uy matbuot kotibi Anna Kelli esa prezident Tramp «faqat Amerika xalqining oliy manfaatlari yo‘lida harakat qiladi va hech qanday manfaatlar to‘qnashuvi yo‘q» deb bayonot berdi.

Ko‘chmas mulklar

Bundan tashqari, Trampning AQShdagi ko‘chmas mulklari: Mayami yaqinidagi Trump National Golf Club 122 million dollar, uning mashhur Mara-Lago klubi esa jami 77 million dollar daromad keltirgan.

Trampning ommaviy birjadagi Trump Media & Technology Group kompaniyasidagi ulushi taxminan 875 million dollarni tashkil etadi.

Deklaratsiya yakunida Trampning an’anaviy moliyaviy bozorlardagi investitsiyalari ham keskin o‘sgani ma’lum bo‘ldi. O‘tgan yilning oxirida uning umumiy investitsiya aktivlari kamida 857 million dollarni tashkil etgan. Oldingi yili bu ko‘rsatkich eng kamida 236 million dollar edi.

Nashrga ko‘ra, moliyaviy hisobot Tramp sof boyligining aniq miqdorini ko‘rsatmaydi, chunki aktivlarning ko‘pchiligi qog‘ozdagi va taxminiy qiymatlarga tayanadi.

Boshqa daromadlar va qarzlar

«Qo‘li pulga to‘lgan» Tramp balansidagi majburiyatlari – qarzlarini ham sezilarli darajada kamaytirdi. Ayniqsa, apellyatsiya sudi Nyu-Yorkdagi fuqarolik firibgarligi ishi bo‘yicha unga qo‘yilgan qariyb yarim milliard dollarlik sud hukmini bekor qilgach, uning moliyaviy holati ancha yengillashdi.

Ammo, Tramp - uni jinsiy zo‘ravonlik va tuhmatda ayblagan yozuvchi Jin Kerroldan haligacha 50 million dollardan ko‘proq qarzdor. Dushanba kuni Oliy sud prezidentning ushbu hukmni qayta ko‘rib chiqish haqidagi iltimosini rad etdi.

Hisobot bir nechta yirik media-gigantlar bilan Tramp o‘rtasida tuzilgan foydali kelishuvlarni ham ko‘rsatdi. Xususan:

• ABC News tuhmat bo‘yicha da’voni sudgacha kelishuv bilan yopish uchun pul to‘ladi;

• Paramount esa «60 daqiqa» dasturidagi intervyu montaji bo‘yicha nizoni hal qilish uchun haq to‘ladi;

• Meta ham 2021 yil 6 yanvarda Trampning hisoblarini bloklagani sababli kiritilgan da’vo bo‘yicha o‘zaro kelishuvga erishdi va tovon to‘ladi.

Bu raqamlar Tramp prezidentlik davrida boyishda davom etayotganidan dalolat beradi.