Qirg‘iz-o‘zbek chegarasida korrupsiyaga qarshi maxsus operatsiyada o‘nlab xodimlar ushlandi

Ma’lumotlarga ko‘ra, soat 19:00 atrofida Qirg‘iziston Milliy xavfsizlik davlat qo‘mitasining (MXDQ) Botken viloyati bo‘yicha boshqarmasi xodimlari «Alfa» maxsus bo‘linmasi jangchilari bilan birgalikda Chegara xizmati, bojxona va veterinariya xizmati xodimlarini hibsga olgan. Ular korrupsiyada gumon qilinmoqda.

Manbalarning ta’kidlashicha, maxsus xizmat xodimlari «Qadamjoy-avtoyo‘l» nazorat-o‘tkazish punkti hududiga kirgan vaqtda shlagbaum yonida postda turgan askar ularga qarata o‘q uzgan. Bundan tashqari, boshqa askar dastlabki ma’lumotlarga ko‘ra, havoga bitta ogohlantiruvchi o‘q uzgan. Qurolning qo‘llanilish holatlari va uning qonuniyligi hozir aniqlanmoqda.

Manbalarning ma’lum qilishicha, tintuv davomida Chegara xizmati xodimlari yonidan 38,5 ming qirg‘iz so‘mi, 5 million 484 ming o‘zbek so‘mi, shuningdek, JAC-3202 xizmat avtomashinasining yukxonasidan yana 200 ming o‘zbek so‘mi topilgan. Haydovchining so‘zlariga ko‘ra, bu pullar xizmat avtomobili o‘rindiqlari uchun g‘ilof sotib olishga mo‘ljallangan.

Shuningdek, manbalarga ko‘ra, Bojxona xizmati xodimlaridan 100 ming qirg‘iz so‘mi va dollardagi pul mablag‘lari musodara qilingan. Aniq summa aniqlanmoqda.

Bundan tashqari, manbalarning ta’kidlashicha, «Chechme-avtoyo‘l» nazorat-o‘tkazish punktining ikki xodimi pul mablag‘larini noqonuniy olayotganda videokuzatuv kameralariga tushib qolgan.

Manbalarga ko‘ra, «Chechme-avtoyo‘l» nazorat-o‘tkazish punktidan 11 nafar va «Qadamjoy-avtoyo‘l» nazorat-o‘tkazish punktidan 16 nafar harbiy xizmatchi Milliy xavfsizlik davlat qo‘mitasining Botken viloyati bo‘yicha boshqarmasiga keltirilgan. Ulardan ikkita AK-74 avtomati, ikkita o‘qdon va 60 ta patron musodara qilingan.

Tergov harakatlari davomida har ikki nazorat-o‘tkazish punkti faoliyati vaqtincha to‘xtatilgani aytilmoqda. Manbalarga ko‘ra, 3 mingga yaqin kishi va 400 ta avtomobil navbatda turgan. Keyinroq «Qadamjoy-avtoyo‘l» nazorat-o‘tkazish punkti orqali harakat tiklangan.

Maxsus operatsiya yuzasidan Qirg‘iziston MXDQ rasmiy izoh bermagan.