Vengriyaning bosh teleradiokompaniyasi «yillar davomidagi yolg‘onlar» uchun uzr so‘radi

Vengriyaning asosiy yangiliklar portali va MTVA davlat teleradiokompaniyasining rasmiy veb-sayti mamlakatning yangi rahbariyati qarori bilan o‘z eshittirishlarini to‘xtatdi. Bu ularning mamlakatning sobiq bosh vaziri Viktor Orbanni qo‘llab-quvvatlab, ko‘p yillar davomida targ‘ibot olib borganlikda ayblangani bilan bog‘liq, deb yozdi Bloomberg.

Telekanal saytida MTVA Orban davridagi tahririyat siyosati uchun uzr so‘ragan xabar paydo bo‘ldi.

«Jamoat ommaviy axborot vositalari yolg‘on gapirmasligi kerak. Uzoq yillar davomida shunday qilganimiz uchun uzr so‘raymiz! Jamoat ommaviy axborot vositalari kelajakda mustaqil va ishonchli bo‘lishi uchun hozir o‘zgarmoqda. Axborot xizmati vaqtincha to‘xtatildi. Biz bilan qoling!», deyiladi teleradiokompaniya saytida.

Vengriyaning yangi bosh vaziri Peter Madyar telekanal faoliyatining to‘xtatilishini «tarixiy kun» deb atadi.

«Bugun ommaviy axborot vositalarida targ‘ibot-tashviqot ishlari yakunlandi. Ular kechasi ham, kunduzi ham, barcha chastotalarda yolg‘on gapirdi. Endi hammasi tugadi», deb qo‘shimcha qildi u.

Madyar 9 may kuni mamlakat bosh vaziri etib saylandi. Orban 1998 yildan 2002 yilgacha va 2010 yildan 2026 yilgacha bosh vazir bo‘lgan. Bloomberg nashrining yozishicha, so‘nggi 16 yil davomida ommaviy axborot vositalarini nazorat qilish uning hokimiyatini saqlab qolishda muhim rol o‘ynagan.

Madyar Orban hukumatini bir necha bor tanqid qilgan va ketayotgan hukumatni budjetni isrof qilishda ayblagan.