Yirik kiberjinoyatchilar tarmog‘i va ikki kishi halok bo‘lgan mudhish avariya - mahalliy dayjest

Yashirin iqtisodiyotni aniqlovchi yangi platforma ishga tushiriladi. Toshkentda yirik kiberjinoyatchilar tarmog‘i fosh etildi. Neft mahsulotlari zaxirasi 2−3 oy uchun yetarli ekani aytildi. Toshkentda Lacetti bo‘linib ketgan «avariya»da ikki kishi halok bo‘ldi. Soxta chek orqali keshbek olmoqchi bo‘lgan 248,5 ming kishi shubhali xaridorlar reyestriga kiritildi. Kunning muhim yangiliklari bilan tanishtiramiz.

Yashirin iqtisodiyotni aniqlovchi yangi platforma ishga tushiriladi

2026 yil oxirigacha “Yashirin iqtisodiyot xaritasi” raqamli platformasi ishga tushiriladi. U 16 ta vazirlik va idora axborot tizimlari bilan integratsiya qilinib, 22 tarmoq, 85 soha, 14 hudud va 208 tumanni qamrab oladi.

Platforma litsenziyasiz faoliyat yuritish, haqiqiy tovar aylanmasini yashirish, ish o‘rinlari va mehnatga haq to‘lash jamg‘armasini kam ko‘rsatish, shuningdek, rentabellik va foydani sun’iy ravishda pasaytirish kabi holatlarni avtomatik tarzda aniqlaydi.

So‘nggi ikki yilda kuzatilmaydigan iqtisodiyot ulushi 35 foizdan 23 foizgacha qisqarib, budjetga qo‘shimcha 38 trillion so‘m tushum ta’minlangan. 2030 yilgacha yashirin iqtisodiyot hajmini yana ikki barobar qisqartirish, band aholi sonini 14 million nafarga, naqdsiz to‘lovlar ulushini esa 75 foizga yetkazish rejalashtirilgan.

Toshkentda yirik kiberjinoyatchilar tarmog‘i fosh etildi

Toshkentdagi ikkita noqonuniy Call-markaz faoliyatiga chek qo‘yildi. Ularda jami 131 nafar (8 nafari chet el fuqarosi) ishlagan bo‘lib, chet tillarini yaxshi biladigan yoshlar va talabalar Kanada, Buyuk Britaniya, Germaniya hamda boshqa davlatlar fuqarolarini treyderlik niqobi ostida kriptoaktivlarga investitsiya kiritishga undab, aldagan.

Tezkor tadbirlarda 136 ta kompyuter, 320 ta telefon va boshqa texnika musodara qilindi. Tergovga ko‘ra, sxemani chet el fuqarosi 48 yoshli O‘zbekiston fuqarosi bilan birga tashkil etgan. Ikki rahbar va yana 18 kishi qamoqqa olindi, 111 nafar shaxs bo‘yicha tergov davom etmoqda. Shuningdek, jinoiy tarmoqning Rossiya, Gruziya, Ukraina va Ozarboyjonda ham sall-markazlari mavjudligi aniqlangan.

Neft mahsulotlari zaxirasi 2−3 oy uchun yetarli ekani aytildi

O‘zbekistonda neft mahsulotlari zaxirasi 2-3 oy uchun yetarli. Bu haqda energetika vazirining birinchi o‘rinbosari Umid Mamadaminov ma’lum qildi.

«Kuz-qishga alohida reja qilib olganmiz. Yetarlicha zaxiralar yaratilgan va hozirgi ichki ishlab chiqarishimiz bor, shularni hisobga oladigan bo‘lsak, 100 ming tonnadan oshiq mahsulot o‘zimizda ishlab chiqariladi. Ya’ni ishontirib aytamanki, kelasi 2-3 oy uchun bizning zaxiramiz yetarli», dedi u.

Uning ta’kidlashicha, hozirgi vaqtda O‘zbekistonda neft mahsulotlari ishlab chiqarish hajmi 1,2 mln tonnadan oshgan. Bundan tashqari, xususiy tadbirkorlar yana 600−700 ming tonna mahsulot import qilmoqda. «Shu hisobdan neft mahsulotlariga bo‘lgan barcha ehtiyojimiz qoplanadi», dedi u.

Toshkentda Lacetti bo‘linib ketgan «avariya»da ikki kishi halok bo‘ldi

Toshkentning Yunusobod tumanida 30 iyun kuni sodir bo‘lgan yo‘l-transport hodisasida Lacetti avtomobili Kia K5 bilan to‘qnashdi va ikkiga bo‘linib ketdi. Hodisada ikki kishi halok bo‘ldi, yana uch kishi, jumladan, ikki bola jarohatlandi.

Dastlabki ma’lumotlarga ko‘ra, yuqori tezlikda harakatlangan Kia K5 va Zeekr avtomobillarini voyaga yetmagan maktab o‘quvchilari boshqargan. Zeekr haydovchisi voqea joyidan qochib ketgan. Holat yuzasidan Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lsa) 3-qismi bilan jinoyat ishi qo‘zg‘atilib, tergov olib borilmoqda.

Soxta chek orqali keshbek olmoqchi bo‘lgan 248,5 ming kishi shubhali xaridorlar reyestriga kiritildi

Soliq qo‘mitasi may oyida soxta fiskal cheklar orqali QQS keshbekini asossiz olishga uringan 248,5 ming nafar fuqaro shubhali xaridorlar reyestriga kiritilganini ma’lum qildi. Natijada 83,1 mlrd so‘mlik keshbek to‘lovlari vaqtincha to‘xtatildi.

Aprel–may oylarida Navoiyda 34,8 mlrd so‘m, Farg‘onada 34,4 mlrd so‘m va Andijonda 23,8 mlrd so‘mlik shubhali keshbek to‘lovlari ushlab qolingan. Soliq qo‘mitasi fuqarolarni Soliq Mobile ilovasida faqat o‘z xaridlari chekini ro‘yxatdan o‘tkazishga chaqirdi.