Soliq keshbekini bekor qilish taklifi va eski mashina egalariga yangi imkoniyatlar - mahalliy dayjest

1 foizlik soliq keshbekini bekor qilib, o‘rniga davlat lotereyasi joriy qilish taklif etildi. «30 yoshdan oshgan» mashina egasidan ekologik kompensatsiya undirilmaydi. O‘qotar qurollarni o‘z ixtiyori bilan topshirganlar mukofotlanadi. Toshkentda cho‘kayotgan ayol va uni qutqarishga uringan Milliy gvardiya xodimi halok bo‘ldi. Kunning muhim yangiliklari bilan tanishtiramiz.

1 foizlik soliq keshbekini bekor qilish taklif etildi

Agar xarid chekini ro‘yxatdan o‘tkazgan shaxslarga 1 foiz keshbek to‘lash amaliyoti to‘xtatilmasa, davlat budjetining bu yo‘nalishdagi xarajatlari joriy yilda 1,8 trln so‘mga yetishi mumkin, bu – bog‘chalar qurilishi uchun ajratilgan mablag‘dan ikki karra ko‘p, deb ma’lum qildi Iqtisodiyot va moliya vazirligi huzuridagi Fiskal tahlillar instituti. Keshbek o‘rniga davlat lotereyasini joriy etish taklif qilindi.

Institut ma’lumotiga ko‘ra, 2022 yilda keshbek to‘lovlari hajmi 820 mlrd so‘mni tashkil etgan bo‘lsa, 2026 yilda bu mablag‘ 1,8 trln so‘mga yetishi mumkin. Vaholanki, – deydi institut vakillari, – 2026 yilda bog‘chalar qurilishi uchun davlat budjetidan bundan ikki barobar kam – 900 mlrd so‘m mablag‘ ajratish rejalashtirilgan.

Tashkilot har bir chek uchun kafolatlangan keshbek o‘rniga, faqatgina soliq xavfi yuqori bo‘lgan sohalar: umumiy ovqatlanish korxonalari, kichik chakana savdo obektlari va boshqalarda ishlovchi kompaniyalarning fiskal cheklarini ro‘yxatdan o‘tkazgan xaridorlar o‘rtasida davlat lotereyasini tashkil etishni taklif qildi.

«30 yoshdan oshgan» mashina egasidan ekologik kompensatsiya undirilmaydi

Ishlab chiqarilganiga 30 yildan oshgan avtomobillar uchun yiliga 30 BHM (12,4 mln so‘m) miqdorida ekologik kompensatsiya joriy etish fikridan voz kechildi. Chiqindilarni boshqarish agentligiga ko‘ra, hukumat ma’murchilik va majburlash o‘rniga, aholini iqtisodiy rag‘batlantiruvchi bozor mexanizmlariga e’tibor qaratmoqda.

Taklif etilayotgan yangi tartibga ko‘ra, avtomobilni baholash hamda qayta ishlash korxonalari tarmog‘i yaratiladi. Eski transport vositasi bozor qiymatida baholanadi, harakati cheklangan nosoz mashinani mutaxassislar joyiga chiqqan holda ko‘rikdan o‘tkazadi.

Avtomobil egasiga baholangan qiymat miqdorida naqd pul to‘lanadi yoki maxsus vaucherlar taqdim etiladi. Muhim jihati, fuqaro ushbu vaucherlardan rasmiy dilerdan yangi avtomobil sotib olishda boshlang‘ich to‘lov sifatida foydalanishi mumkin bo‘ladi.

O‘qotar qurollarni o‘z ixtiyori bilan topshirganlar mukofotlanadi

Hukumat qarori bilan tasdiqlangan yangi nizomga ko‘ra, ro‘yxatga olinmagan qurol va uning o‘q-dorilarini, o‘qotar qurolning asosiy qismlarini, portlovchi materiallarni va portlatish qurilmalarini o‘z ixtiyori bilan topshirganlar pul mukofoti bilan rag‘batlantirilishi mumkin.

Bunda ariza beruvchi o‘zining yashash joyi bo‘yicha ichki ishlar organiga murojaat qiladi. Ariza beruvchi tomonidan topshirilayotgan qurol qismlarga bo‘laklangan, patronlari olingan, shuningdek, qurol va uning o‘q-dorilari, o‘qotar qurolning asosiy qismlari begona shaxslarning ko‘rish imkoniyatini istisno etadigan o‘ramga joylashtirilgan bo‘lishi lozim.

Pul mukofoti Qoraqalpog‘iston Respublikasi Ichki ishlar vazirining, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari boshlig‘ining buyrug‘i asosida beriladi.

Toshkentda cho‘kayotgan ayol va uni qutqarishga uringan Milliy gvardiya xodimi halok bo‘ldi

Ma’lum qilinishicha, ayol Xotira xiyoboni yaqinida Bo‘zsuv kanaliga o‘zini tashlagan. Uning suvda oqib ketayotganini Milliy gvardiyaning Toshkent shahar boshqarmasi harbiy xizmatchilari ko‘rib qolgan. Xizmatchilardan biri ayolning hayotini saqlab qolish maqsadida darhol suvga tushgan.

Biroq kanaldagi kuchli oqim tufayli ayol ham, Milliy gvardiya xodimi ham suvga cho‘kib, halok bo‘lgan. Xabarda halok bo‘lgan xodim 2005 yilda tug‘ilgani aytilgan.

Ikkala jasad ham topilib, yaqinlariga topshirilgan.