Mehnat nizolarini ko‘rib chiqishda yangi tartib va Zarafshon daryosidagi fojia - mahalliy dayjest

1 avgustdan mehnat nizolari bo‘yicha ixtisoslashgan sudyalar ish boshlaydi. Bolaga zo‘ravonlik qilgan tarbiyachiga bog‘chada ishlash 1 yilga taqiqlanishi mumkin. Zo‘ravonlikdan jabrlanganlarga boshpana muddati 30 kundan 6 oygacha uzaytiriladi. Zarafshon daryosida 3 nafar yigit cho‘kib ketdi. Kunning muhim yangiliklari bilan tanishtiramiz.

1 avgustdan mehnat nizolari bo‘yicha ixtisoslashgan sudyalar ish boshlaydi

2026 yil 1 avgustdan boshlab mehnat nizolarini ko‘rishga ixtisoslashgan sudyalar faoliyati yo‘lga qo‘yiladi. Yangi tartib mehnatga oid ishlarni tezkor va sifatli ko‘rib chiqish, sud amaliyotini birxillashtirishga qaratilgan.

Yangi tartibga ko‘ra, Oliy sudning fuqarolik ishlari bo‘yicha sudlov hay’atida mehnat nizolari bo‘yicha 4 nafar sudya faoliyat ko‘rsatadi.

Shuningdek, Qoraqalpog‘iston Respublikasi sudi, viloyatlar va Toshkent shahar sudlarining fuqarolik ishlari bo‘yicha sudlov hay’atlarida 3 nafardan ixtisoslashgan sudya ishlaydi. Qarorga asosan, 2026 yil 1 avgustdan keyin sudlarga kelib tushgan mehnat nizolariga oid barcha arizalar aynan ixtisoslashgan sudyalar o‘rtasida taqsimlanadi.

Bolaga zo‘ravonlik qilgan tarbiyachiga bog‘chada ishlash 1 yilga taqiqlanishi mumkin

Senatning navbatdagi majlisida ayrim qonun hujjatlariga qo‘shimcha va o‘zgartirishlar kiritish ma’qullandi. Jumladan, Ma’muriy javobgarlik to‘g‘risidagi kodeksda ta’lim tashkilotida tarbiya va ta’lim berish jarayonida voyaga yetmagan bolaga nisbatan jismoniy zo‘ravonlik sodir etganlik, shuningdek uni tahqirlaganlik uchun ma’muriy javobgarlik belgilanmoqda.

Bundan tashqari, pedagogik faoliyatni amalga oshirish jarayonida voyaga yetmaganga nisbatan jismoniy va (yoki) ruhiy zo‘ravonlikka oid huquqbuzarlik sodir etganligi uchun ma’muriy javobgarlikka tortilgan shaxsga nisbatan bir yil muddat davomida maktabgacha ta’lim tashkilotida pedagogik faoliyat bilan shug‘ullanishi mumkin emasligi nazarda tutilmoqda.

Qonun prezident tomonidan imzolanganidan keyin kuchga kiradi.

Zo‘ravonlikdan jabrlanganlarga boshpana muddati 30 kundan 6 oygacha uzaytiriladi

Senatning yalpi majlisida ma’qullangan qonun bilan Ijtimoiy himoya milliy agentligining xotin-qizlarni tazyiq va zo‘ravonlikdan himoya qilish sohasidagi vakolatlari aniq qilib belgilanmoqda.

Tazyiq va zo‘ravonlikdan jabrlangan xotin-qizlar hamda ularning voyaga yetmagan farzandlariga davlat hisobidan malakali yuridik yordam ko‘rsatish tizimi yo‘lga qo‘yilmoqda. Bundan tashqari, tazyiq va zo‘ravonlikdan jabrlanuvchi maxsus markazga 6 oygacha (oldin 30 kungacha) muddatga joylashtirilishi mumkinligi belgilanmoqda.

Shuningdek, tazyiq va zo‘ravonlikdan jabrlangan xotin-qizlar hamda ularning voyaga yetmagan farzandlari uchun qator yengilliklar joriy etilmoqda. Jumladan, ular yo‘qotilgan biometrik pasport o‘rniga yangi pasport olish, nikoh tuzilganligi yoki tug‘ilganlik haqida takroriy guvohnoma rasmiylashtirishda davlat bojini to‘lashdan ozod etilmoqda.

Qonun prezident tomonidan imzolanganidan keyin kuchga kiradi.

Zarafshon daryosida 3 nafar yigit cho‘kib ketdi

Navoiy viloyatida 3 nafar yigit Zarafshon daryosiga cho‘kib halok bo‘ldi. Ma’lum bo‘lishicha, Karmana tumani Katta machit mahallasida yashovchi 4 yigit 8 iyul kuni tush payti Zarafshon daryosiga cho‘milishga borgan. Ulardan 3 nafari cho‘kib ketgan. FVB qutqaruvchilari ularning jasadini hodisa joyidan turli uzoqlikda topgan.

Halok bo‘lganlar 2008 yilda tug‘ilgan J.S., 2012 yilda tug‘ilgan J.S. hamda 2010 yilda tug‘ilgan O.T., ularning ikkisi aka-uka ekani aytilmoqda.