O‘zbekistonda ish joyidagi baxtsiz hodisalar oqibatida olti oyda 140 nafarga yaqin inson vafot etdi

Davlat mehnat inspeksiyasi 2026 yilning 1-yarim yilida mehnat faoliyati bilan bog‘liq baxtsiz hodisalar statistikasini e’lon qildi.

Qayd etilishicha, o‘tgan olti oy davomida 447ta baxtsiz hodisa sodir bo‘lgan. Ularning 21 tasi guruhiy, 311 tasi og‘ir oqibatli, 113 tasi esa o‘lim bilan yakunlangan.

Baxtsiz hodisalar oqibatida 494 nafar fuqaro jabrlangan bo‘lib, ulardan 337 nafari og‘ir, 20 nafari yengil tan jarohati olgan, 137 nafari esa halok bo‘lgan.

Eng ko‘p baxtsiz hodisalar sanoat (144 ta) va qurilish (127 ta) sohalarida yuz bergan. Shuningdek, boshqa sohalarda 87 ta, transport va logistika sohasida 17 ta, savdo va xizmatlarda 16 ta, sog‘liqni saqlash hamda qishloq va suv xo‘jaligida 14 tadan, ta’limda 13 ta baxtsiz hodisa qayd etilgan.

Eng kam baxtsiz hodisalar madaniyat va sport (2ta) hamda axborot texnologiyalari (3ta) sohasida sodir bo‘lgan.

Eng ko‘p baxtsiz hodisalar Toshkent shahri (95 ta), Toshkent (58 ta) va Qashqadaryo (38 ta) viloyatlarida qayd etilgan. Eng kam baxtsiz hodisalar esa Jizzax (16 ta), Surxondaryo (16 ta) va Xorazm (13 ta) viloyatlarida kuzatilgan.

Qolgan hududlar bo‘yicha statistika quyidagicha:

• Buxoro — 34 ta
• Samarqand — 33 ta
• Andijon — 33 ta
• Navoiy — 31 ta
• Farg‘ona — 23 ta
• Qoraqalpog‘iston — 20 ta
• Sirdaryo — 19 ta
• Namangan — 18 ta

Jabrlanganlar va ularning oila a’zolariga 10 mlrd 376 mln so‘m miqdorida bir martalik hamda oylik zarar pullari undirib berilgan.