BAA Ho‘rmuz bo‘g‘oziga muqobil yo‘nalish quradi - OAV 

Dubay port operatori DP World Birlashgan Arab Amirliklarining sharqiy qirg‘og‘ida muhim Jabal Ali portiga qaramlikni kamaytirish va Ho‘rmuz bo‘g‘ozini chetlab o‘tish uchun yangi port va konteyner terminalini qurishni rejalashtirmoqda, deb yozdi Financial Times.

Gazeta manbalariga ko‘ra, Dubay port operatori Fujayra qirg‘oq zonasida mutlaqo yangi ko‘p funksiyali port va amirlikning mavjud bandargohida yangi terminal qurish bo‘yicha muzokaralar olib bormoqda. Port quvvatlarining bir qismini Dubaydan tashqariga ko‘chirish Jabal Alining o‘sishi tufayli global savdo va moliya markazi maqomini olgan amirlik uchun tub o‘zgarishlarni anglatadi.

DP World rejalari BAA hukumatining AQSh va Isroil hujumlaridan so‘ng Eron dronlari va raketa hujumlaridan jabr ko‘rgan bo‘g‘ozga qaramlikni kamaytirish orqali mamlakat iqtisodiyotini Eronning kelajakdagi ehtimoliy dushmanlik harakatlaridan himoya qilishga qaratilgan keng qamrovli tashabbusiga mos keladi.

Yangi loyiha DP World kompaniyasining O‘mon ko‘rfazidagi faoliyatini kengaytirib, konteynerlarga bo‘g‘oz orqali o‘tmasdan mamlakatga kirish va undan chiqish imkonini beradi, shundan so‘ng ular quruqlik orqali Dubay, Abu-Dabi va Fors ko‘rfazidagi qo‘shni mamlakatlarga yuk mashinalari orqali tashiladi.

Eron AQSh va Isroil zarbalariga javoban bo‘g‘ozni yopganidan so‘ng, Jabal Alidagi faollik 90-95 foizga kamaydi, bu esa port operatorini dengiz yo‘liga muqobil yo‘llarni izlashga undadi. Qayd etilishicha, DP World hozir hukumat amaldorlari bilan kelishuvning dastlabki shartlarini muhokama qilmoqda, yangi loyihaning tuzilishi va moliyalashtirilishi esa hali to‘liq ma’lum emas. Kompaniya yuqori martabali vakilining so‘zlariga ko‘ra, yangi port bir yarim yil ichida qurib bitkazilishi mumkin.

O‘tgan yili 15,6 million yigirma futlik konteynerlarga ishlov bergan Jabal Ali porti Dubayning global logistika va reeksport markaziga, xususan, Xitoy va Afrika o‘rtasida shakllanishida muhim rol o‘ynadi. Biroq, uning joylashuvi portni Eron va Ummon o‘rtasidagi tor suv yo‘liga bog‘liq qilib qo‘ymoqda.