Bekobodda yangi metallurgiya majmuasi va anomal issiq haftaning boshlanishi - mahalliy dayjest

Bekoboddagi O‘zbekiston metallurgiya kombinati huzurida yangi Quyuv-prokatlash majmuasi ishga tushirildi. 13–19 iyul kunlari O‘zbekiston hududida anomal-g‘ayritabiiy issiq va qurg‘oqchilik bo‘lishi kutilmoqda. Anomal issiq sabab butun respublika bo‘ylab bog‘chalar yopilishi mumkin. Yo‘llarda eng ko‘p uchrayotgan qoidabuzarliklar ma’lum qilindi. Samarqand viloyatida prokuror o‘rinbosari qo‘lga olindi. Kunning muhim yangiliklari bilan tanishtiramiz.

Bekobodda yangi metallurgiya majmuasi foydalanishga topshirildi

Toshkent viloyatidagi Bekobod shahrida O‘zbekiston metallurgiya kombinati huzuridagi yangi Quyuv-prokatlash majmuasi ishga tushirildi. Mamlakatda ilk bor issiq prokatlangan po‘lat listlar ishlab chiqariladigan mazkur majmua yiliga 1 million tonna mahsulot ishlab chiqarish quvvatiga ega bo‘lib, 1 200 ta yangi ish o‘rni yaratadi.

Prezident Shavkat Mirziyoyev Bekobod shahriga tashrifi doirasida majmuaning tantanali ochilish marosimida ishtirok etdi. Davlat rahbari kombinat jamoasi, mehnat faxriylari va xorijiy hamkorlarni ushbu muhim voqea bilan tabrikladi.

Yangi Quyuv-prokatlash majmuasi O‘zbekistonda issiq prokatlangan po‘lat listlar ishlab chiqarish bo‘yicha birinchi loyiha hisoblanadi. Uning ishga tushirilishi natijasida yiliga 8 trillion so‘mlik 1 million tonna issiq prokatlangan po‘lat list ishlab chiqariladi. Bu Toshkent va Samarqand metallurgiya zavodlarining prokat listlarga bo‘lgan ehtiyojini to‘liq qoplash imkonini beradi.

Anomal issiq hafta boshlandi

13–19 iyul kunlari O‘zbekiston hududida anomal-g‘ayritabiiy issiq va qurg‘oqchilik bo‘lishi kutilmoqda.

Hafta davomida quruq va me’yordan ziyod o‘ta issiq ob-havo sharoiti yuzaga keladi. «O‘zgidromet» ma’lumotiga ko‘ra, yaqin kunlarda harorat +41...+43 darajagacha, shimolda, janubda va cho‘l hududlarida esa +44...+46 darajagacha ko‘tarilishi mumkin.

Issiq kunlarda inson organizmi qizishi, suvsizlanishi, qon bosimi o‘zgarishi, yurak-qon tomir tizimiga ortiqcha yuklama tushishi, issiq urishi holatlari yuzaga kelishi mumkin. Sog‘liqni saqlash vazirligi aholiga, ayniqsa, xavf guruhiga kiruvchi fuqarolarga ehtiyot choralariga qat’iy amal qilishni tavsiya etdi.

Anomal issiq sabab butun respublika bo‘ylab bog‘chalar yopilishi mumkin

O‘zbekistonda kuzatilayotgan anomal issiq tufayli davlat maktabgacha ta’lim tashkilotlari faoliyatini vaqtincha to‘xtatish masalasi ko‘rib chiqilmoqda. Bu haqda Kun.uz'ga Maktabgacha va maktab ta’limi vazirligi ma’lum qildi.

Bu borada hokimliklar, Sanitariya-epidemiologiya qo‘mitasi hamda «O‘zgidromet» bilan hamkorlik yo‘lga qo‘yilgan.

Qayd etilishicha, qaror respublika bo‘yicha yagona tartibda emas, balki har bir hududdagi ob-havo va sanitariya-epidemiologik vaziyatdan kelib chiqqan holda qabul qilinadi. Avvalroq anomal issiq sabab Qoraqalpog‘iston Respublikasidagi davlat va nodavlat maktabgacha ta’lim tashkilotlari faoliyati ham vaqtincha to‘xtatilgan edi.

Yo‘llarda eng ko‘p uchrayotgan qoidabuzarliklar ma’lum qilindi

Yo‘l harakati xavfsizligi xizmati (YHXX) 2026 yil 4 fevraldan 10 iyulgacha bo‘lgan davrda yo‘l harakati qoidalarini buzgani uchun qariyb 400 ming fuqaroga nisbatan ma’muriy ogohlantirish chorasi qo‘llanganini ma’lum qildi. Shuningdek, 671 nafar haydovchi 12 balldan ortiq jarima ball to‘plagan.

Ma’lumotlarga ko‘ra, hisobot davrida eng ko‘p qayd etilgan qoidabuzarliklar xavfsizlik kamarini taqmasdan transport vositasini boshqarish, haydovchilik vaqtida mobil telefondan foydalanish, harakatlanish jarayonida video tomosha qilish, belgilangan tezlikni oshirish, to‘xtash va to‘xtab turish qoidalarini buzish hamda yo‘l harakati qoidalari talablariga rioya etmaslik bilan bog‘liq bo‘lgan.

Shuningdek, piyodalar tomonidan yo‘lning qatnov qismini belgilanmagan joydan kesib o‘tish holatlari ham eng ko‘p uchragan qoidabuzarliklar qatoriga kiritilgan.

Samarqand viloyatida prokuror o‘rinbosari qo‘lga olindi

Samarqand viloyati, Urgut tumani prokurori o‘rinbosari pora olish bilan bog‘liq jinoyatda gumon qilinib ushlandi.

Tergov materiallariga ko‘ra, u Past Darg‘om tumani prokuraturasida faoliyat yuritgan davrida xizmat mavqeyidan foydalanib, mahalliy mas’uliyati cheklangan jamiyat tomonidan tabiiy gazdan noqonuniy foydalanish oqibatida davlatga yetkazilgan 2 milliard 887 million so‘m zarar miqdorini 805,9 million so‘mgacha kamaytirib berish evaziga vositachilar orqali 6,5 ming AQSh dollari va 35 million so‘m olgani aniqlangan. Shuningdek, u mazkur korxonaga mansabdorlariga nisbatan Jinoyat kodeksining 169-moddasi bilan qo‘zg‘atilgan jinoyat ishi doirasida zarar miqdorini 150–200 million so‘mgacha kamaytirish hamda sud organlaridagi tanishlari orqali yengilroq jazo tayinlanishiga yordam berishini aytib, korxona egasidan yana 15 ming AQSh dollari talab qilgan.

Holat yuzasidan unga nisbatan jinoyat ishi qo‘zg‘atilib, qamoq ehtiyot chorasi qo‘llandi. Ayni paytda ish bo‘yicha dastlabki tergov harakatlari davom ettirilmoqda.