AQSh Davlat kotibi Haaga tribunalini tugatishga va’da berdi

Rubio sudni Amerika suverenitetiga tajovuz qilishda aybladi va tribunalni qo‘llab-quvvatlashni davom ettirgan mamlakatlarga sanksiyalar bilan tahdid qildi.

«Hukumatimiz ixtiyoridagi barcha vositalardan foydalanib, ittifoqchilar bilan hamkorlikda, agar kerak bo‘lsa, XJSni g‘ishtma-g‘isht buzamiz», deb yozdi Rubio The Wall Street Journal gazetasidagi maqolasida.

Rubioning aytishicha, XJS AQShga qarshi «o‘q va raketalar bilan emas, balki xalqaro huquq kuchi bilan urush olib bormoqda».

Uning so‘zlariga ko‘ra, amerikalik harbiy xizmatchilar va siyosatchilar o‘z mamlakatini himoya qilgani uchun doimiy ravishda jinoiy ta’qib va hatto qamoq jazosiga tortilish xavfi ostida chet el sudyalari hukmiga tushib qolishi mumkin.

Davlat departamenti rahbarining ta’kidlashicha, XJS «AQShga nafrat bilan birlashgan so‘l nohukumat tashkilotlari, o‘zbilarmon globalistlar va uchinchi dunyo dushmanlari tarmog‘i» tomonidan qo‘llab-quvvatlanadi.

Davlat departamenti mamlakatlarni Rim statutida ishtirok etishdan voz kechishga va XJSni moliyalashtirishni to‘xtatishga ishontirmoqchi. Davlat departamentining nomi oshkor etilmagan vakili CNN telekanaliga ma’lum qilishicha, XJS yurisdiksiyasini tan olgan mamlakatlar sanksiyalar, kirish taqiqlari va vizalarning bekor qilinishiga duch kelishi mumkin. Davlat departamenti, shuningdek, AQSh huquq-tartibot idoralari bilan hamkorlik qiladigan, o‘z hududida Amerika bazalarini joylashtiradigan yoki AQSh himoyasidan foydalanadigan davlatlardan yordam kutishini ogohlantirdi.

Kampaniya Donald Tramp ma’muriyatining Haaga sudiga tazyiqining yangi bosqichi bo‘ldi. Fevral oyida AQSh prezidenti sud bosh prokurori Karim Xon, uning ikki o‘rinbosari va olti sudyasiga Isroilning G‘azo sektoridagi harakatlari va Afg‘onistondagi amerikalik harbiylar bilan bog‘liq tergovlar uchun sanksiyalar kiritgan edi. Vashington XJS yangi tergovlarni boshlashi mumkinligidan xavotirda.

Niderlandiyaning Haaga shahrida joylashgan Xalqaro jinoyat sudi 2002 yilda Rim statuti asosida tashkil etilgan. AQSh bu shartnomani ratifikatsiya qilmadi. So‘nggi yillarda sud Rossiya prezidenti Vladimir Putin, Isroil bosh vaziri Binyamin Netanyahu va Isroilning sobiq mudofaa vaziri Yoav Galantni hibsga olishga order berdi.