Bolalarning ommaviy zaharlanishi bo‘yicha sud hukmi va pulli avtoturargoh uchun haq to‘lamaganlarga jarima - mahalliy dayjest

Toshkent viloyati bog‘chalaridagi ommaviy zaharlanishda 11 kishi aybdor deb topildi. Anomal issiqda ba’zi bog‘chalar faoliyati to‘xtatildi, yuk mashinalar harakati cheklandi. O‘zbekiston bo‘ylab qabul test sinovlari boshlandi. Pulli avtoturargoh uchun haq to‘lamaganlarga jarima qo‘llanishi mumkin. Kunning muhim yangiliklari bilan tanishtiramiz.

Toshkent viloyati bog‘chalaridagi ommaviy zaharlanishda 11 kishi aybdor deb topildi

2025 yil sentabr oyida Toshkent viloyati bog‘chalarida kuzatilgan 2 mingga yaqin bolaning ommaviy zaharlanishi ishi bo‘yicha sud jarayoni yakuniga yetdi.

Jinoyat ishlari bo‘yicha Bo‘ka tuman sudi 11 nafar sudlanuvchini Jinoyat kodeksining 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) 1-qismi bilan aybli deb topdi.

Sud hukmi bilan 3 kishi 3,5 yil muddatga, yana shuncha kishi 3 yil muddatga ozodlikdan mahrum etildi. 5 kishiga 3 yil muddatga ozodlikni cheklash jazosi tayinlandi. Shuningdek, sudlanuvchilarga Jinoyat kodeksining 45-moddasiga asosan muayyan huquqdan mahrum qilish belgilandi. Sudlanuvchilar hukm ustidan shikoyat berishi yoki protest keltirishi mumkin.

Anomal issiqda ba’zi bog‘chalar faoliyati to‘xtatildi, yuk mashinalar harakati cheklandi

Bolalarni anomal issiqning salbiy ta’siridan himoyalash va xavfsizligini ta’minlash maqsadida Navoiy viloyatining ayrim tumanlarida bog‘chalar faoliyati to‘xtatildi. Avvalroq, Qoraqalpog‘iston Respublikasi va Xorazm viloyatida ham shunday choralar ko‘rilgan edi.

Surxondaryo viloyatida anomal issiq havo sharoiti sabab og‘ir yuk avtomobillari harakatiga vaqtinchalik cheklov joriy etiladi. Chora avtomobil yo‘llari qoplamasini saqlash va ularning muddatidan oldin shikastlanishining oldini olish maqsadida qabul qilingan.

«O‘ztemiryo‘lyo‘lovchi» AJ anomal issiq tufayli poyezdlardagi muammodan ogohlantirdi. Kompaniya ma’lumotiga ko‘ra, yuqori harorat tufayli ayrim yo‘lovchi vagonlaridagi sovitish tizimlari vaqtincha «kamroq samara» bilan ishlashi mumkin.

Anomal-g‘ayritabiiy issiq ob-havo sharoiti 19 iyulgacha davom etishi kutilmoqda.

O‘zbekiston bo‘ylab qabul test sinovlari boshlandi

14 iyul kuni O‘zbekistonning barcha hududlarida 2026–2027 o‘quv yili uchun davlat oliy va kasbiy ta’lim muassasalariga qabul test sinovlari boshlandi. Imtihonlar 23 iyulga qadar ikki smenada o‘tkaziladi.

Bilim va malakalarni baholash agentligi ma’lumotiga ko‘ra, test sinovlari har kuni ikki smenada tashkil etiladi. Birinchi smena soat 8:00 dan 11:00 gacha, ikkinchi smena esa 15:00 dan 18:00 gacha davom etadi.

Test jarayonlari to‘liq videokuzatuv ostida o‘tkaziladi va onlayn tarzda namoyish etiladi. Abituriyentlar va ularning yaqinlari imtihonlarni maxsus onlayn platforma orqali kuzatishi mumkin.

Pulli avtoturargoh uchun haq to‘lamaganlarga jarima qo‘llanishi mumkin

O‘zbekistonda yo‘lbo‘yi to‘xtash joylaridan foydalanganlik uchun haq to‘lamaslik yoki to‘lovdan bo‘yin tovlash holati uchun ma’muriy javobgarlik belgilanishi mumkin. Toshkent shahri hokimligi shunday tashabbus bilan chiqdi.

Loyihada Ma’muriy javobgarlik to‘g‘risidagi kodeksni «pulli to‘xtab turish joylaridan foydalanganlik uchun to‘lov qilishdan bo‘yin tovlash» deb nomlangan yangi 128−11-modda bilan to‘ldirish ko‘zda tutilgan. Loyihaga ko‘ra, yo‘lbo‘yi pulli to‘xtash joylaridan foydalanganlik uchun belgilangan muddatda haq to‘lamaslik yoki to‘lovdan bo‘yin tovlash BHM 2 baravari (1 sentabrgacha – 824 ming so‘m, 1 sentabrdan boshlab – 880 ming so‘m) miqdorida jarimaga sabab bo‘ladi. Bu norma qonunchilikka muvofiq to‘xtash joylaridan bepul yoki imtiyozli foydalanish huquqiga ega bo‘lgan shaxslarga nisbatan tatbiq etilmaydi.

28 iyulga qadar regulation.gov.uz portalida e’lon qilingan ushbu loyiha yuzasidan taklif va mulohazalarni bildirish mumkin.