Qoʻshimcha funksionallar
-
Tungi ko‘rinish
Rossiyada migrantlar harakatini kuzatish uchun telefon sotib olishga majburlanishi mumkin
Hukumat migrantlar ustidan nazoratni kuchaytiruvchi choralarni tobora ko‘proq joriy qilmoqda.
Kelajakda Rossiyaga boruvchi migrantlar mobil telefon sotib olishga majbur bo‘ladi, bu orqali hukumat ularni kuzatib borishi mumkin. Bu haqda Ichki ishlar vaziri o‘rinbosari Igor Zubov ma’lum qildi.
«Kelajakda nima bo‘lishi, qayoqqa ketayotganimiz hammaga qiziq. Bu yerga, ayniqsa, ishlash yoki uzoq muddatga kelgan har bir migrant ro‘yxatdan o‘tishda telefon sotib olishi shart bo‘ladi. Bu telefonda uning elektron profili joylashadi. Va biz har bir migrantning qayerdaligini bilib turamiz», dedi u.
Rasmiyning so‘zlariga ko‘ra, shu tufayli migrantlar bir shahardan ikkinchisiga «nazoratsiz» ko‘chib o‘ta olmaydi.
Shuningdek, hukumat telefon yordamida migrantlarni hujjati muddati tugayotgani yoki davlat idorasiga borishi kerakligi haqida ogohlantirishni ham rejalashtirmoqda.
2025 yil sentabr oyidan boshlab Moskvada tajriba o‘tkazilmoqda: unga ko‘ra, ishlash uchun kelgan barcha xorijliklar o‘z joylashuvini ko‘rsatib turuvchi «Amina» ilovasini o‘rnatishi shart. Agar geolokatsiya ma’lumotlari ketma-ket uch kun davomida kelib tushmasa, chet el fuqarosi ro‘yxatdan chiqariladi.
