Qoʻshimcha funksionallar
-
Tungi ko‘rinish
AQSh grin-karta talabgorlari uchun 100 ming dollarlik garov joriy etishi mumkin
Prezident Donald Tramp ma’muriyati AQSh tashqarisidagi Amerika konsulliklari orqali grin-karta uchun hujjat topshirayotgan ayrim xorij fuqarolariga 100 ming dollarlik moliyaviy garov joriy etish imkoniyatini o‘rganmoqda. Bu haqda The Wall Street Journal mazkur rejadan xabardor manbalarga tayanib xabar berdi.
Ta’kidlanishicha, AQSh Davlat departamenti qonuniy immigratsiyani qat’iylashtirishga qaratilgan keng ko‘lamli kampaniyaning bir qismi bo‘ladigan tashabbusni ishlab chiqmoqda. Asosiy maqsad — moliyaviy imkoniyati cheklangan shaxslarning mamlakatga kirishini cheklash va yangi immigrantlarning davlat nafaqalariga tayanmasdan, o‘zini o‘zi ta’minlay olishini kafolatlashdir.
100 ming dollarlik garov, katta ehtimol bilan, qaytariladigan bo‘ladi — agar ariza beruvchi bir necha yil davomida “jamiyatga yuk” (public charge) bo‘lmasa, mablag‘lar unga qaytarib beriladi. Biroq, bunday shartning o‘ziyoq bu rejani o‘ta qat’iy to‘siqqa aylantiradi.
Tashabbus mualliflarining fikricha, bunday choralar AQSh ijtimoiy tizimiga tushadigan yukni kamaytirishga va amerikalik soliq to‘lovchilarning manfaatlarini himoya qilishga yordam beradi.
Hozircha taklif muhokama bosqichida turibdi. Tanqidchilar uni allaqachon kamsituvchi va rivojlanayotgan mamlakatlardan kelgan immigrantlarga qarshi qaratilgan deb atamoqda. Qat’iy migratsiya siyosati tarafdorlari esa, aksincha, bu g‘oyani Amerika iqtisodiyotini himoya qilish yo‘lidagi mantiqiy qadam sifatida olqishlamoqda.
Ekspertlar yakuniy qaror yaqin oylarda qabul qilinishi va AQSh immigratsiya tizimini kompleks isloh qilishning yana bir unsuriga aylanishi mumkinligini ta’kidlamoqda.
