Birodar O‘zbekiston bo‘yicha pozitsiyamiz aniq – Kobul O‘zbekiston haqidagi xabarlarni rad etdi

Afg‘oniston hukumati o‘z rasmiylaridan biri O‘zbekiston haqida tanqidiy fikr bildirgani aytilgan xabarlar yuzasidan raddiya berdi. 16 iyul kuni O‘zbekistonning Kobuldagi elchixonasi nomiga Fazilatlarni targ‘ib qilish va yomonliklarning oldini olish vazirligi tomonidan raddiya murojaati kelib tushgan.

Unda ayrim doiralar va ommaviy axborot vositalari vaqti-vaqti bilan ikki qardosh davlat o‘rtasidagi ishonch va yaxshi qo‘shnichilik munosabatlari muhitiga putur yetkazishga va faktlarni buzib, ularni noto‘g‘ri talqin qilish orqali o‘zlarining g‘ayrli maqsadlariga erishishga harakat qilishi ta’kidlangan.

Jumladan, raddiya murojaatida quyidagilar keltirilgan:

«Birodar O‘zbekiston bo‘yicha pozitsiyamiz aniq. Ushbu yurt islom ummatining ko‘plab buyuk ulamolari, jumladan Imom Buxoriyning muqaddas Vatanidir. Afg‘oniston va O‘zbekiston o‘rtasida chuqur diniy, tarixiy, madaniy va xalqlar mushtarakligi mavjud. Biz ushbu munosabatlar va o‘xshashliklarni alohida qadrlaymiz.

Shu bois, ayrim ommaviy axborot vositalari va ijtimoiy tarmoqlarda O‘zbekiston deb salbiy talqin qilingan bayonot va chiqishlar haqiqatga mutlaqo to‘g‘ri kelmaydi. Biz bunday da’volarni qat’iyan rad etamiz va ularni faktlarni buzish, deb ataymiz.

Ikki davlat o‘rtasidagi birodarlik, o‘zaro hurmat va yaxshi munosabatlar muhiti bundan keyin ham yanada mustahkamlanishiga ishonch bildiramiz».

Eslatib o‘tamiz, 15 iyul kuni BBC O‘zbek xizmat mahalliy manbalarga tayanib, «Tolibon» hukumati Amri ma’ruf va nahiy munkar vaziri (Fazilatlarni targ‘ib qilish va yomonliklarning oldini olish vaziri) shayx Muhammad Xolid Hanafiy «O‘zbekistonda islomning faqat nomi qolgani»ni aytgani haqida xabar tarqatgandi. Bu xabarda keltirilishicha, u O‘zbekiston diniy ulamolarini ham tanqid qilib, mamlakatda diniy masalalarni diniy ulamolar emas, balki dunyoviy davlat tizimi belgilayotganiga e’tiroz bildirgan.

Hozirga kelib bu so‘zlar aks etgan video tarmoqdan o‘chirib tashlangan.