Zelenskiy Sirskiyni lavozimidan bo‘shatishni o‘ylamoqda – OAV

Ukraina prezidenti Volodimir Zelenskiy mamlakat qurolli kuchlari bosh qo‘mondoni Aleksandr Sirskiyni iste’foga chiqarish haqida o‘ylamoqda, deb yozmoqda Financial Times o‘z manbalariga tayanib.

Nashrning ma’lumot berishicha, Ukraina prezidenti frontdagi vaziyatni baholash va bosh qo‘mondonlikka ehtimoliy nomzodlarni muhokama qilish uchun 18–19 iyul kunlari qo‘mondonlar bilan yig‘ilish o‘tkazadi. Gazeta suhbatdoshlarining ta’kidlashicha, ushbu qaror qo‘mondonlik butun front chizig‘idagi mudofaa uchun zarar keltirmasdan topshirilishi ta’minlangan taqdirdagina qabul qilinadi. 

FT xabariga ko‘ra, Sirskiyni iste’foga chiqarish masalasi u bilan nizoga kirishgan mudofaa vaziri Mixail Fyodorov bo‘shatilganidan so‘ng paydo bo‘lgan. Nashr manbalari Sirskiy vazirni bo‘shatish masalasini prezidentga ultimatum tarzida qo‘yganini aytishgan.

Fyodorov lavozimidan ozod qilinganidan keyin bosh qo‘mondonni korrupsiya, islohotlarga to‘sqinlik qilish va “strategik uzoqni ko‘rmaslik”da ayblagan. 

Kadrlar almashinuvi fonida Kiyev, Lviv va Odessada norozilik namoyishlari bo‘lib o‘tdi. Namoyishchilar dastlab iste’foga chiqarilgan vazirni qo‘llab-quvvatlagan bo‘lsa, keyinroq qurolli kuchlar bosh qo‘mondonini ham lavozimidan bo‘shatishni talab qilishgan.