Qashqadaryo viloyati – O‘zbekiston janubida, Qashqadaryo havzasida Hisor va Zarafshon tog‘ tizmalari orasida joylashgan.

Viloyat shimolda Samarqand, janubiy-sharqda Surxondaryo, shimoliy g‘arbda Buxoro viloyatlari, sharqda Tojikiston, janubiy-g‘arbda Turkmaniston va ozroq hududda Navoiy viloyatlari bilan chegaradosh.

Qashqadaryo viloyatining hududi 28,6 ming kilometr kvadrat bo‘lib, bu yerda 3 mln 515 ming nafar (2023 yil 1 iyul holatiga ko‘ra) aholi yashaydi.

Viloyat 1924 yilda tashkil etilgan va keyinchalik boshqa viloyatlarga qo‘shib yuborilgan. So‘nggi marta 1964 yil 7 fevralda yangidan tashkil etilgan.

Qashqadaryo viloyati tarkibida 13 ta tuman bor. Ma’muriy markazi Qarshi shahri.

Qashqadaryo viloyatining tabiati juda xilma-xil. Viloyatning bir qismi cho‘llardan, boshqa qismi tog‘lardan iborat.

O‘zbekistondagi qadimiy shaharlardan biri Shahrisabz Qashqadaryo viloyatida joylashgan. Bu shaharda Amir Temur tomonidan qurdirilgan Oqsaroy majmuasining bir qismi, yana tarixiy Ko‘k gumbaz masjidi saqlanib qolgan.

Viloyat aholisining asosiy qismini o‘zbeklar (91,2 foiz) tashkil etadi. Bundan tashqari, viloyatda kam sonli tojiklar, ruslar, ukrainlar, ozarboyjonlar va boshqa millat vakillari istiqomat qilishadi.