Хорижий экспертлар, Тадбиркорлик кодекси лойиҳасини ишлаб чиқиш учун шакллантирилган ишчи гуруҳ аъзолари иштирок этган ушбу семинарда тадбиркорлик субъектларини кичик, ўрта ва йирик тоифаларга ажратиш ўзига хос хусусиятлари ва тадбиркорлик субъектлари ташкилий-ҳуқуқий шакллари мавзулари атрофлича муҳокама қилинди.

Билдирилишича, Тадбиркорлик кодекси лойиҳасини ишлаб чиқишга 3 йилга яқин вақт сарфланди. Лойиҳани ишлаб чиқишга нафақат миллий экспертлар, балки халқаро экспертлар ҳам жалб қилинган, ҳужжат 5 ойдан ортиқ жамоатчилик муҳокамасидан ўтказилган.

Тадбиркорлар таклифлари, уларни қийнаб келаётган тизимли муаммоларни ўрганиш учун республика даражасида ишчи гуруҳлар ташкил этилиб, республика барча ҳудудларида тадбиркорлар билан кодекс лойиҳаси муҳокама қилинди.

Жамоатчилик, тадбиркорлар ва соҳа экспертлари билан ўтказилган муҳокамалар натижасида 1500 га яқин таклифлар келиб тушди ҳамда лойиҳада коррупциявий омиллар мавжудлиги, гендер тенгликка таъсири ва бошқа масалалар бўйича ўтказилган сўровномаларда 1200 дан ортиқ фуқаро иштирок этди. Келиб тушаётган таклифлар асосан, тадбиркорликни қўллаб-қувватлаш, кредит ажратиш, текширувлар, солиқ соҳасига тааллуқлидир.

Бугунги кунда ушбу таклифлар асосида Тадбиркорлик кодекси лойиҳаси мутахассислар томонидан маромига етказилмоқда. Кодексни ишлаб чиқишда асосий урғу тадбиркорлик соҳасида ягона ёндашувни белгилашга, тадбиркор ҳуқуқий ҳимоясига, бюрократия ва маъмурий юкни, давлат органлари бизнесга аралашувини кескин камайтиришга ҳамда бизнес вакилларини қўллаб-қувватлашга қаратилди. 

Хусусан:

  • тадбиркорлик фаолиятини тартибга солувчи 16 та асосий тамойиллар, тадбиркорлик эркинлиги, тадбиркорлар фаолиятига давлат ноқонуний аралашишига йўл қўймаслик, тадбиркорлик субъектлари ҳуқуқлари устуворлиги белгиланди;
  • тадбиркорлик субъектлари кичик, ўрта ва йирик тоифаларга ажратилди;
  • тадбиркорлар фаолиятидаги амалдаги текширувлар сони икки баравар қисқартирилиб, кодекс билан текширувлар қатъий рўйхати белгиланди;
  • тадбиркорликка давлат томонидан аралашув кескин қисқартирилиб, аниқ чегаралари белгиланди.