“Ер қаъри тўғрисида”ги қонунга мувофиқ ҳамда унинг ижросини самарали ташкил этиш, ҳуқуқий қоидаларни қўллашда турлича талқинлар ва қарама-қаршиликларни бартараф этиш мақсадида президентнинг айрим ҳужжатларига ўзгартириш ва қўшимчалар киритиш назарда тутилган.
Хусусан, 2018 йил 26 ноябрдаги ПҚ-4030-сон қарорга киритилаётган ўзгартиришларга кўра, ҳужжатнинг 2-бандидаги “35 баравари” ифодаси “100 баравари” сўзлари билан алмаштирилиши белгиланмоқда. Шунингдек, қимматбаҳо металларни олтин изловчилар усулида қазиб олиш фаолияти билан шуғулланувчи шахсларнинг реестрини юритиш Тоғ-кон саноати ва геология вазирлиги ҳузуридаги “Ер қаъридан фойдаланиш маркази” давлат муассасаси томонидан амалга оширилиши кўзда тутилган.
Қайд этилишича, уларга ажратилган ер қаъри участкалари устидан давлат назорати эса Тоғ-кон саноати ва геология вазирлиги ҳузуридаги Тоғ-кон саноати ва геология соҳасини назорат қилиш инспекцияси томонидан амалга оширилади.
Мазкур ҳужжат ўзгаришлари “Ер қаъри тўғрисида”ги қонун ижросини таъминлаш ҳамда соҳадаги ҳуқуқий зиддиятларни бартараф этишга қаратилгани билдирилган.
