Qashqadaryoda paxta ortilgan yuk mashinasi yonib ketdi

Qashqadaryo viloyati Ko‘kdala tumani hududidan o‘tuvchi yo‘lda paxta ortib ketayotgan yuk mashinasi yonib ketgan.

Favqulodda vaziyatlar vazirligining xabar berishicha, hodisa 2023 yil 21 fevral kuni A-378 Samarqand-G‘uzor avtomobil yo‘lining Ko‘kdala tumanining 85-kilometrida sodir bo‘lgan.

Ma’lum qilinishicha, haydovchi yuk mashinasi salonida yong‘in hidini sezib, uning kuzov qismida yong‘in boshlanganini ko‘rgan.

Hodisa joyiga zudlik bilan hududiy FVV yong‘in-qutqaruv ekipajlari yetib kelgan va olovni o‘chirgan. Ungacha yuk mashinasiga ortilgan paxtaning asosiy qismi yonib ketgan.

Qayd etilishicha, hodisa oqibatida hech kim halok bo‘lmagan va jarohat olmagan. Faqat yuk mashinasi jiddiy shikastlangan.