Samarqand davlat tibbiyot universitetining Jizzax filiali tashkil etiladi

Vazirlar Mahkamasining shu to‘g‘ridagi qarori normativ-huquqiy hujjatlar loyihalari muhokamasi portali (regulation.gov.uz)ga joriy yilning 21 yanvar sanasiga qadar muhokama uchun qo‘yildi.

Unga ko‘ra, mazkur filialning asosiy vazifalari hududda malakali tibbiyot kadrlarini tayyorlash, xorijiy oliy ta’lim muassasalarining ilg‘or tajribasini tatbiq etish, shuningdek, respublika va xorijiy oliy ta’lim muassasalari hamda ilmiy markazlarga iqtidorli yosh bitiruvchilarni magistratura va doktoranturaga muntazam yuborish orqali filial ilmiy-pedagogik kadrlar salohiyatini oshirib borishdan iborat.

Filialda 2023/2024 o‘quv yilidan ta’lim faoliyati Vazirlar Mahkamasi huzuridagi Ta’lim sifatini nazorat qilish davlat inspeksiyasi tomonidan sifatli ta’lim berish uchun yetarli sharoitlar to‘liq yaratilganligi to‘g‘risidagi ijobiy xulosasi olinish sharti bilan boshlanadi.

2023/2024 o‘quv yilidan Jizzax davlat pedagogika universitetining “Davolash ishi” va “Pediatriya ishi” bakalavriat ta’lim yo‘nalishida tahsil olayotgan talabalarga o‘qishini Samarqand davlat tibbiyot universitetining Jizzax filialida davom ettirishlariga ruxsat beriladi.

Filialning yangi bino va inshootlari qurib bitkazilgunga qadar o‘quv jarayonini tashkil etish uchun vaqtinchalik Jizzax Abu Ali ibn Sino nomidagi jamoat salomatligi texnikumi bazasida bino ajratish ko‘zda tutilgan.