"Gruziya orzusi – Demokratik Gruziya" partiyasi asoschisi va rahbari Bidzina Ivanishvili 1,5 mlrd dollarlik aktivlarini o‘zi tashkil etgan "Kartu" xayriya jamg‘armasiga o‘tkazdi.
Uning aniqlik kiritishicha, aktivlarga turistik obektlar, tijoriy ko‘chmas mulk, ofislar hamda Tbilisi va Gruziya regionlaridagi yer uchastkalari kiradi.
Ivanishvilining so‘zlariga ko‘ra, u va turmush o‘rtog‘i o‘zlari uchun 200 mln dollar olib qolishgan.
"Shuningdek, farzandlarimga biror yangilik yaratish, o‘zlarini to‘liq anglab yetish va rivojlanishda to‘xtab qolmasliklari uchun keraklicha mablag‘ni qoldiraman", - dedi Ivanishvili.
"Kartu" xayriya jamg‘armasi 1995 yilda tashkil etilgan va o‘tgan vaqt davomida turli sohalarda qiymati 3 mlrd dollardan ortiq loyihalarni amalga oshirgan.
Ivanishvili Gruziyaning eng boy odami hisoblanadi, avvalroq Forbes jurnali uning boyligini 5,5 mlrd dollar atrofida deb baholagandi. Ivanishvili boyligiga 1990-yillarda Rossiyada erishgan. U turli davrlarda metallurgiya biznesi, ko‘chmas mulk va moliya sohalaridagi operatsiyalar bilan shug‘ullangan.
Ivanishvili 2011 yilda "Gruziya orzusi – Demokratik Gruziya" partiyasiga asos solgan. Partiya bir yildan so‘ng parlament saylovlarida muxolif koalitsiya tarkibida g‘alaba qozongan, Ivanishvili esa Gruziya hukumati rahbari bo‘lgan.
