Rustam Sa'diyev : “Baron” filmidagi aktyorlar kartinaning ikkinchi qismida qatnashmaydi

Taniqli rejissyor, o‘zining shov-shuvli filmlari bilan muxlislar qalbidan joy ola bilgan, izlanishdan va o‘rganishdan charchamaydigan ijodkor Rustam Sa'diyev Kun.uz saytining navbatdagi mehmoni bo‘ldi. U bilan o‘zbek kinosining istiqboli, kelajakdagi yuksak rejalar, mavjud muammolar va boshqa mavzularda  suhbatlashildi. Rustam Sa'diyev ushbu uchrashuvda “Baron” filmining ikkinchi qismi haqida to‘xtalib o‘tar ekan, shunday dedi:

“Shuni aytib o‘tishim kerak-ki, “Baron” filmi ikkinchi qismining ssenariysi deyarli tayyor bo‘lib qoldi. Uni “O‘zbekkino” qoshidagi badiiy kengashga taqdim etish niyatidamiz. Filmni suratga olish ishlari ayrim sabablarga ko‘ra, to‘xtatib qo‘yilgan edi. Buning o‘ziga yarasha sabablari bo‘lib, ayni damda bu haqda to‘xtalib o‘tmoqchi emasman. Lekin vaqti kelganda, albatta, bu haqda so‘zlab beraman. Ammo ayni kunlarda barchasi ijobiy tomonga o‘zgardi. Shu bois yaqin kunlarda filmning suratga olish ishlari boshlanib ketadi. 

Yana shuni ma'lum qilmoqchimanki, “Baron” filmining aktyorlar jamoasi kartinaning ikkinchi qismida deyarli qatnashmaydi. Faqatgina ayta olishim mumkin bo‘lgan va filmda rol ijro etishi aniq bo‘lgan aktyorlarga Farhod Mahmudov, Dilnoza Kubayeva, Shahzoda Matjonova va Muhammadiso Abdulxayrovlar kiradi. Chunki kastingda yangi aktyorlar tanlanishi mumkin. Bunga oldindan hech narsa deb bo‘lmaydi. Bundan tashqari, jahon va rus kinosi yulduzlari ham mazkur filmda rol ijro etishadi.

Ikkinchi qismdagi voqealar rivoji ham birinchisi singari ma'no kasb etadi, biroq unda keskin holatlar, kutilmagan voqealar va ularning yechimini ko‘rish mumkin.

Niyatim “Baron” filmini aynan mana shu yilda suratga olib bo‘lish. Sportchi musobaqaga tayyorlanish oldidan sparinglarda qatnashib turganidek, bunday ulkan g‘oyani amalga oshirish uchun ham vaqt talab etiladi. Orada imkon bo‘lsa, boshqa filmlarni ham suratga olishim mumkin. Bu menga “forma”dan chiqib ketmasligimni ta'minlaydi, ya'ni sparing vazifasini o‘taydi”, deydi rejissyor.

Eslatma: yaqin kunlarda rejissyor Rustam Sa'diyev bilan bo‘lgan suhbatning to‘liq shakli bilan saytimiz orqali tanishish imkoniyatiga ega bo‘lasiz.