2017 yil 31 mart kuni Andijon viloyati Oltinko‘l tumani Jalabek qishlog‘idan o‘tgan Andijon-Shahrixon transport yo‘li chetida noma'lum shaxs shu hududda yashovchi Dilshod Komilov bilan janjallashib uning kurak qismining old o‘ng tomoniga pichoq urib, og‘ir tan jarohati yetkazgan. Oqibatda kasalxonaga olib borilgan jabrlanuvchi vafot etgan, deb xabar bermoqda Andijon viloyati ichki ishlar boshqarmasi.
Jinoyatchi pichoq urib, voqea joyidan qochib ketganida guvohlar jinoyatchini qora rangdagi “Captiva” mashinasida ekanliklarini eslab qolganlar xolos.
Oltinko‘l IIB tezkor qidiruv bo‘limi xodimlari tomonidan qidiruv ishlari boshlangan. Shunda jinoyat sodir qilingan kundan uch kun avval 26 martdan 27 martga o‘tar kechasi tuman IIB xodimlari tungi profilaktika tadbirlari davomida Oraziy MFY hududida nazoratsiz qoldirilgan “Captiva” rusumli avtomashina egasi bilan suhbat o‘tkazganliklari va mashinaning oldi o‘rindig‘ida o‘tkir tig‘li ho‘jalik pichog‘ini aniqlangani yordam berdi.
Tezkor harakatlar davomida yuqoridagi jinoyatni Shahrixon tumanida yashovchi Bahodir Jalilov o‘z boshqaruvidagi “Captiva” mashinasida kelib sodir etgani aniqlandi. Hozirda surishtiruv harakatlari davom ettirilmoqda.
