Buyuk Britaniya Yevropa Ittifoqi (YeI)dan chiqish jarayonida 100 milliard yevro to‘lamoqchi emas. Bu haqida mamlakatning Brexit ishlari vaziri Devid Devis ma'lum qildi.
Yevrokomissiya vakili Jan-Klod Yunker bundan avval Brexit bo‘yicha muzokaralar boshlangandan keyin Bryussel Londonga 60 milliard dollar miqdoridagi "hisob"ni taqdim etishini tasdiqlagan edi. O‘z navbatida, Yevroparlament vakili Antonio Tayani Buyuk Britaniya Yevroittifoqqa o‘nlab milliard to‘lashi kerakligini aytgan.
Chorshanba kuni Financial Times gazetasi Bryussel o‘z moliyaviy talablarini oshirgani va endilikda Buyuk Britaniyaning YeIdan chiqish jarayonidagi moliyaviy majburiyatlari 100 milliard yevroga baholanayotganini ma'lum qildi.
"Biz 100 milliard to‘lamaymiz. Qilishimiz kerak bo‘lgan yagona ish - barcha huquq va majburiyatlarni batafsil muhokama qilib olish", - dedi Devis Britaniyaning ITV telekanaliga bergan intervyusida.
Kuni kecha Buyuk Britaniya bosh vaziri Tereza Mey YeIdan chiqish bo‘yicha muzokaralarda o‘z fuqarolari huquqlarini qat'iy va davomli himoya qilishga va'da berdi.
