Turkiya Ichki ishlar vazirining o‘rinbosari Axmet Avshar boshchiligidagi delegatsiya O‘zbekiston Respublikasi Ichki ishlar vazirligiga tashrif buyurdi. Mehmonlarni O‘zbekiston Respublikasi ichki ishlar vazirining birinchi o‘rinbosari general-mayor Davron Nazarmuhamedov qabul qildi. Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar bermoqda.
Uchrashuvda D.Nazarmuhamedov respublika ichki ishlar organlarida o‘tkazilayotgan tub islohotlar, axborot kommunikatsiya texnologiyalarini tizimga joriy etilishi yuzasidan mehmonlarga ma'lumot berdi. A.Avshar ham o‘z o‘rnida jinoyatchilikni oldini olish bo‘yicha Turkiya Ichki ishlar vazirligida amalga oshirilayotgan ishlar bilan tanishtirdi. Tomonlar ushbu yo‘nalishda ikki tomonlama hamkorlik masalalarini mustahkamlash, o‘zaro tajriba almashish yuzasidan fikr almashdilar.
Tashrifning ikkinchi kuni tomonlar jinoyatchilikka qarshi kurashish va huquqni muhofaza qilish tizimining ta'lim sohasidagi hamkorlik hamda xavfsizlik va jinoyatchilikka qarshi kurashish bo‘yicha ikki tomonlama hamkorlik mexanizmini yaratishga qaratilgan takliflarni birgalikda ishlab chiqish yuzasidan hukumatlararo xalqaro shartnomalar loyihasi bo‘yicha ekspertlar yig‘ilishi va muzokaralar o‘tkazilishi rejalashtirilgan.
Shuningdek, mehmonlar Samarqand shahrining diqqatga sazovor joylariga ham tashrif buyuradi.
