Amerikaning Los-Anjyeles shahrida politsiya ta'qibidagi jinoyatchi Trader Joeʼs supermarketlar tarmog‘i do‘konlaridan birida mijozlarni garovga oldi. Garovdagilardan biri — do‘kon xodimasi — halok bo‘lgan. Bu haqda matbuot anjumanida shahar meri Erik Garsetti ma'lum qilgan.
Hujum vaqtida supermarketda bo‘lgan 6 kishi shifoxonaga yotqizilgan, ularning hayotiga jiddiy xavf yo‘q.
Supermarketga qurolli jinoyatchi politsiya ta'qibidan qochaturib kirib qolgan. U avtomobilini Trader Joeʼs binosi yaqinida urib olgandi.
Politsiya uni o‘z buvisi va yana bir ayolni o‘qotar quroldan jarohatlaganidan keyin quvayotgandi.
U supermarketga bostirib kirganida ichkarida xodimlar va mijozlardan iborat 50 nafarga yaqin kishi bor edi. Ularning ayrimlari oyna orqali chiqib qochgan, ayrimlari do‘konning turli nuqtalariga yashiringan.
Politsiya bilan 3 soat davom etgan muzokaralardan keyin jinoyatchi taslim bo‘lgan. Politsiya ma'lumotiga ko‘ra otishma vaqtida uning qo‘li jarohatlangan.
Hozircha hodisaning boshqa tafsilotlari oshkor etilmagan, jinoyatchi 28 yoshda ekani ma'lum.