Atomdan tinch maqsadlarda ko‘plab sohalarda foydalansa bo‘ladi - jurnalistlar Yadro fizikasi institutida bo‘lishdi

2019 yil 10 iyunda O‘zbekistonning qator OAV vakillari ishtirokida O‘zbekiston Fanlar Akademiyasi Yadro fizikasi institutiga press-tur tashkil etildi. Unda Institut, undagi SM-Suv-suvli reaktor faoliyati, Institut tarkibidagi «Radiopreparat» korxonasi, bu yerda ishlab chiqarilayotgan preparatlar xususida atroflicha ma'lumot berildi. 

O‘zbekiston FA prezidenti, Yadro fizikasi instituti direktori Behzod Yo‘ldoshev ushbu maskan tashkil etilishi, uning ilmiy yutuqlari, bugungi kunda ijtimoiy tarmoqlarda keng muhokamalarga sabab bo‘layotgan O‘zbekistonda AES qurilishiga doir keng tushunchalar va izohlar berdi. 

Mazkur ilmiy-tadqiqot instituti 1956 yilda tashkil etilgan bo‘lib, yadro fizikasi, qattiq jism va materialshunoslik radiatsiyaviy fizikasi, faollashtirish tahlili va radiokimyo, ilmiy asbobsozlik, axborot texnologiyalari yo‘nalishida ilmiy tadqiqotlar olib boriladi. 

Bundan tashqari, ma'lum qilinishicha, ayni shu maskanda tibbiyot asboblarini gamma-nurlanish orqali xavfsiz ravishda zararsizlantirish va sterillash kabi ishlar amalga oshiriladi. 

 «Radiopreparat» korxonasida ishlab chiqiladigan ayrim turdagi izotoplar va radionukleid moddalari tozaligi va sifatliligi bo‘yicha dunyoda yetakchi o‘rinlarda turadi. Bu korxona dunyoning AQSh, Germaniya, Xitoy, Ukraina kabi 10dan ortiq mamlakatiga sifatli radionukleid preparatlarni yetkazib beradi. U dunyoning shu kabi mahsulotlar ishlab chiqaruvchi yetakchi 20ta korxonasidan biri hisoblanadi.

Shu bilan birga, institut huzuridagi Suv-suvli tadqiqot reaktori, gamma-nurlash qurilmasi, U-150 va U-115 siklotronlari, neytron generatori kabilar atomdan tinch maqsadlarda foydalanish imkoniyatlarini namoyon etadi. 

Mazkur press-tur tafsilotlari bilan videolavhamiz orqali batafsilroq tanishishingiz mumkin.