20:50 / 12.11.2019
0
2627
O‘zbekiston delegatsiyasi “O‘zbekiston – Yevropa Ittifoqi” hamkorlik kengashi majlisida ishtirok etdi 

11 noyabr kuni O‘zbekiston Respublikasi tashqi ishlar vaziri Abdulaziz Komilov boshchiligidagi delegatsiya “O‘zbekiston – Yevropa Ittifoqi” Hamkorlik kengashining 15-majlisida ishtirok etdi.

Muzokaralar chog‘ida ikki tomon kun tartibidagi bir qator masalalar, siyosiy, iqtisodiy, investitsiya, inson huquqlari, ta'lim va xavfsizlik sohalaridagi hamkorlikning holati va istiqbollari muhokama qilindi.

O‘zbekiston delegatsiyasi rahbari Yevropa Ittifoqining Markaziy Osiyo uchun yangi Strategiyasining Yevropa komissiyasi tomonidan qabul qilinishini mamnuniyat bilan qayd etdi va mintaqa davlatlarining barqarorligini oshirish, ularning farovonligini ta'minlash va YeI bilan o‘zaro hamkorlikning institutsional mexanizmlarini mustahkamlash kabi hujjatda qayd etilgan muhim ustuvor yo‘nalishlar ahamiyatini ta'kidladi.

Uchrashuvda O‘zbekiston va YeI o‘rtasida Kengaytirilgan sheriklik va hamkorlik to‘g‘risidagi bitim (KShHB) bo‘yicha muzokaralarning dekabr oyida bo‘lib o‘tadigan to‘rtinchi raundiga tayyorgarlik ko‘rish masalalariga alohida e'tibor qaratildi. Muzokara jarayonining konstruktiv xususiyati va erishilgan natijalardan qoniqish bildirildi.

Majlis doirasida mintaqaviy va xalqaro siyosat masalalari yuzasidan ham fikr almashildi.

Majlis yakuniga ko‘ra O‘zbekiston va Yevropa Ittifoqi delegatsiyalari rahbarlari matbuot vakillari bilan uchrashdilar.

Vazirlar turli masalalarni ochiq va konstruktiv ruhda muhokama qilishga imkon bergan muzokaralarga yuqori baho berdilar.

Yevropa tomoni yangi istiqbollarni ochib berayotgan O‘zbekistonda amalga oshirilayotgan keng ko‘lamli islohotlar jarayonini har tomonlama qo‘llab-quvvatlashga tayyorligini izhor etdi.

Ta'kidlanganidek, Hamkorlik kengashining majlisi O‘zbekiston va YeI o‘rtasidagi siyosiy muloqotni yanada mustahkamlashga xizmat qiladi.

O‘zbekiston va Yevropa Ittifoqi o‘rtasida Kengaytirilgan sheriklik va hamkorlik to‘g‘risidagi bitim loyihasi bo‘yicha muzokaralar sur'atidan qoniqish izhor etildi va muzokaralar 2020 yilda yakunlanishiga umid bildirildi.

Yevropa Ittifoqi delegatsiyasi rahbari, Finlyandiya tashqi ishlar vaziri Pekka Haavisto mamlakatning ijtimoiy-siyosiy hayotida muhim voqea bo‘lishi kutilayotgan va 22 dekabr kuni bo‘lib o‘tadigan parlament saylovlarini kuzatish uchun YeXHTning to‘laqonli missiyasini taklif etish to‘g‘risidagi O‘zbekiston qarorini ma'qulladi.

Yevropa Ittifoqi O‘zbekistonning qo‘shni davlatlar va xalqaro sheriklar bilan faol va konstruktiv hamkorligini qo‘llab-quvvatladi.

Tomonlar ishbilarmonlik muhitini yaxshilash, savdo va investitsiyalarga ko‘maklashish, O‘zbekistonning JST va “GSP+” imtiyozlar tizimiga qo‘shilishi, qishloq xo‘jaligi va xususiy tadbirkorlik, energetika, ta'lim va tadqiqotlarni rivojlantirish imkoniyatlarini muhokama qildilar.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top