23:03 / 10.05.2020
105844
Ronalduning tanlovi. U O‘zbekiston MMA assotsiatsiyasi futbolkasini qayerdan olgan?
Foto: Instagram/ Cristiano Ronaldo

7 may kuni jahon futbol yulduzi Krishtianu Ronaldu Instagramdagi sahifasida farzandlari bilan tushgan surat joyladi. Futbolchi suratni «Eng katta muhabbat» deb nomladi.

Bir qarashda bu oddiy surat edi, ammo undagi bir detal Ronalduning o‘zbekistonlik muxlislari e'tiborini tortgan bo‘lishi aniq. «Yuventus» superyulduzi UMMA.UZ yozuvli futbolkada edi.

O‘zbekiston MMA assotsiatsiyasi uning bu suratini ilova qilgan holda Instagram sahifasida shunday post qoldirdi: «Krishtianu Ronaldu UMMAA.uz futbolkasida. Har doimgidek u to‘g‘ri tanlov qildi».

Bu esa O‘zbekiston aralash jang san'ati assotsiatsiyasiga tegishli brend va tabiiyki Ronalduning O‘zbekiston MMA ittifoqi bilan qanday aloqasi bo‘lishi mumkin degan savol paydo bo‘ldi. Shuningdek, bu katta pul to‘langan reklama ekani haqida taxminlar bildirildi. Chunki odatda jahon yulduzlari biror brendning kiyimlarini reklama shartnomasi asosida kiyishadi.

Bu masalaga oydinlik kiritish maqsadida O‘zbekiston aralash jang san'ati assotsiatsiyasi bilan bog‘landik. Tashkilot birinchi vitse-prezidenti Sherzod Toshmatov Kun.uz muxbiriga quyidagilarni ma'lum qildi.

«Tabiiyki Ronaldu bizning futbolkamizni kiyishi uchun pul to‘lamaganmiz. Birinchidan, bizda bunaqa katta pul yo‘q, bundan tashqari, hozir oldimizda bundan muhimroq ishlar turibdi.

Biz hali yangi tashkilotmiz, shu sabab mahalliy miqiyosda rivojlanish haqida o‘ylayotgan bir vaqtda global piar uchun pul ajratishimiz mantiqqa to‘g‘ri kelmaydi. Biz hali mamlakat doirasidagi musobaqalar o‘tkazish va aralash jang san'atini ommalashtirish bo‘yicha ko‘proq bosh qotiryapmiz.

Albatta, marketing borasida ham harakatlar bo‘lyapti. Ronaldu buyuk sportchi, lekin biz assotsiatsiya brendini rivojlantirish uchun reklama «yuzini» futbolchilar orasidan qidirmagan bo‘lardik. Suratda Ronaldu bizning eski logotipimiz tushirilgan futbolkani kiygan. Fevral oyida yangi logotipni e'lon qilgandik va agar Ronalduga pul to‘lagan bo‘lsak, u yangi logotipdagi libosni kiygan bo‘lardi.

Ronaldu qolgan ko‘plab jahon sporti vakillari qatorida bizning brend chiqargan futbolkani sovg‘a sifatida qabul qilgan. Biz ko‘plab yulduzlarga sovg‘a yuborganmiz va ularning hech biriga ularni qandaydir holatda kiyish majburiyatini qo‘ymaganmiz. Ronaldu bizning futbolkani kiyishga qaror qilibdi va bu juda ajoyib. Suratda logotipimiz to‘liq ko‘rinmagan bo‘lsa-da, buni ko‘rish yoqimli bo‘ldi», deydi Sherzod Toshmatov.

Foto: UMMAA brendining 2020 yil fevralidagi taqdimoti marosimi
Foto: UMMAA brendining 2020 yil fevralidagi taqdimoti marosimi

Ma'lumot uchun, Portugaliya milliy jamoasi hamda «Yuventus» klubi hujumchisi Krishtianu Ronalduning Instagramdagi o‘quvchilari soni 217 milliondan ortiq va bu borada unga yetadigan foydalanuvchi yo‘q.

Top