O‘zbekiston Milliy axborot agentligi rahbariyatida o‘zgarish bo‘ldi.
Milliy mass-mediani qo‘llab-quvvatlash va rivojlantirish jamoat fondi direktori, bloger Xushnudbek Xudoyberdiyev O‘zbekiston Milliy axborot agentligi bosh direktori o‘rinbosari etib tayinlandi. U 2013 yildan buyon O‘zA bosh direktori o‘rinbosari lavozimda ishlab kelgan Jumanazar Meliqulov o‘rnini egallagan.
«O‘zbekiston Respublikasi Vazirlar Mahkamasining qaroriga binoan, Xushnud G‘ayratovich Xudayberdiyev O‘zbekiston Milliy axborot agentligi bosh direktorining o‘rinbosari etib tayinlandi va boshqa ishga o‘tishi munosabati bilan Jumanazar Xaitovich Melikulov ushbu lavozimdan ozod qilindi», deyiladi agentlik xabarida.
Xushnud Xudoyberdiyev 2020 yil yanvaridan buyon Milliy mass-mediani qo‘llab-quvvatlash va rivojlantirish jamoat fondi direktori sifatida ishlab kelayotgandi.
O‘zA bosh direktori va uning o‘rinbosarlari O‘zbekiston prezidenti bilan kelishilgan holda Vazirlar Mahkamasi tomonidan lavozimga tayinlanadi va lavozimidan ozod qilinadi.
2019 yilning dekabr oyida prezident qarori bilan O‘zAning vazifalari yangilangandi. Agentlik qoshida maslahat kengashi va media markaz tashkil etish rejalashtirilgan. 2020 yilning fevral oyida O‘zA unga yangi qurilmalar sotib olish va yangi portalni ishga tushirish uchun 5,4 milliard so‘m ajratishni ko‘zda tutuvchi hukumat qarorini jamoatchilik muhokamasiga qo‘ygandi.
