11:42 / 25.07.2020
14940
Eronda urib tushirilgan Ukraina samolyotining qora qutilari rasshifrovka qilindi

8 yanvar kuni Eronda urib tushirilgan Ukraina yo‘lovchi samolyotining qora qutilaridagi ma'lumotlar rasshifrovka qilindi.

Foto: Picture Alliance

Olingan ma'lumotlarga ko‘ra, samolyotga tashqi ta'sir bo‘lgani tasdiqlangan.

«Ukraine International Airlines» aviakompaniyasiga tegishli bo‘lgan va 8 yanvar kuni Eronda urib tushirilgan samolyot bortidagi qora qutilarning ma'lumotlari rasshifrovka qilindi. Olingan ma'lumotlar samolyotga tashqi ta'sir bo‘lganini tasdiqladi», - dedi Ukraina tashqi ishlar vaziri o‘rinbosari Yevgeniy Yenin.

«Endi kelasi haftada Eron bilan dastlabki muzokaralarni o‘tkazamiz», - deb qo‘shimcha qildi mulozim.

«Ukraine International Airlines» aviakompaniyasining Boeing 737-800 yo‘lovchi samolyoti Tehron – Kiyev yo‘nalishida PS752 reysini amalga oshirishi lozim edi. 8 yanvar kuni erta tongda «Imom Humayniy» aeroportidan havoga ko‘tarilgan avialayner raketalar bilan urib tushirildi.

Samolyot bortidagi 167 yo‘lovchi va 9 ekipaj a'zosining barchasi halok bo‘ldi. Eron hukumati 11 yanvar kuni avialayner harbiylarning xatosi tufayli urib tushirilganini tan oldi.

Keyinchalik, Islom inqilobi qo‘riqchilari korpusi (IIQK) aerokosmik kuchlari qo‘mondoni Amir Ali Hojizoda samolyotning urib tushirilishi bilan bog‘liq javobgarlikni o‘z zimmasiga oldi.

Mavzu
Eronda Ukraina samolyoti halokati
Eronda 8 yanvar kuni «Ukraina xalqaro avialiniyalari» (MAU)ning Boeing 737 samolyoti halokatga uchradi. Uning bortidagi 180ga yaqin kishi halok bo‘ldi.
Barchasi
Top