Sog‘liqni saqlash vazirligi matbuot xizmati koronavirusga qarshi kurashda o‘zbekistonlik shifokorlarga ko‘mak berish maqsadida yana bir guruh rossiyalik mutaxassislar tashrif buyurgani haqida xabar berdi.
Ushbu guruh 35 nafar tibbiyot xodimidan iborat bo‘lib, Rossiyaning eng nufuzli epidemiolog, pulmonolog, anesteziolog-reanimatolog, infeksionist, rentgenolog, terapevt, jarrohlar, laborator diagnostika mutaxassislari hamda anestezist hamshiralarini jam qilgan.
Guruhga tibbiyot fanlari doktori Konstantin Pokrovskiy rahbarlik qiladi.
Vazirlik xabarida qayd etilishicha, ushbu mutaxassislar mamlakatning turli hududlaridagi tibbiyot muassasalarida bo‘lib, mahalliy shifokorlar bilan hamkorlikda bemorlarni davolash ishlarida qatnashadi.
Bungacha ham koronavirusga qarshi kurashda yordam berish uchun 40 nafarga yaqin rossiyalik shifokor 1 oy davomida O‘zbekistonda bo‘lgandi.
