Hay’at yig‘ilishida o‘ndan ortiq rahbar xodimlar lavozimidan ozod etildi, yana qator rahbar xodimlarga turlicha jazo choralari qo‘llandi. Xususan, Namangan, Sirdaryo, Navoiy, Xorazm va Surxondaryo viloyatlari sog‘liq saqlash boshqarmalari boshliqlariga hayfsan berildi.
Sog‘liqni saqlash vazirligining 2023 yil birinchi yarim yilligi yakunlariga bag‘ishlab 8 avgust kuni o‘tkazilgan hay’at yig‘ilishida to‘rt viloyat SSB boshliqlariga chora ko‘rildi, bir necha tibbiyot birlashmalari boshliqlari vazifasidan ozod etildi.
Sog‘liqni saqlash vaziri Amrillo Inoyatov raisligida olib borilgan yig‘ilishda ma’lum qilinishicha, Toshkent viloyatida rejadagi 10 ta, Qashqadaryoda 9 ta, Sirdaryoda 5 ta oilaviy shifokor punktidan birortasi tashkil etilmagan.
Oilaviy yangi poliklinikalar faoliyatini yo‘lga qo‘yish borasida Samarqand, Toshkent, Qashqadaryo, Navoiy va Xorazm viloyatlarida sustkashlikka yo‘l qo‘yilgan.
Birlamchi tizimni aholiga yanada yaqinlashtirish maqsadida oilaviy shifokor punkti, oilaviy poliklinika va mahalla tibbiyot punktlarini tashkil etish bo‘yicha davlat rahbari topshiriqlarini bajarishda yo‘l qo‘ygan sustkashligi uchun:
- Qashqadaryo viloyati sog‘liqni saqlash boshqarmasi boshlig‘i B.Teshayev va Qoraqalpog‘iston Respublikasi sog‘liqni saqlash vaziri M.Kurbanovga o‘rtacha oylik ish haqidan 30 foiz jarima;
- Namangan viloyati sog‘liqni saqlash boshqarmasi boshlig‘i A.Iminov, Sirdaryo viloyati sog‘liqni saqlash boshqarmasi boshlig‘i X.Hakimov, Navoiy viloyati sog‘liqni saqlash boshqarmasi boshlig‘i N.Safoyev va Xorazm viloyati sog‘liqni saqlash boshqarmasi boshlig‘i S.Sodiqovga hayfsan intizomiy jazo choralarini qo‘llash belgilandi.
SSV matbuot xizmatiga ko‘ra, vazir olib borilgan o‘rganishlar davomida hududiy sog‘liqni saqlash boshqarmalari tomonidan profilaktik ko‘riklar va skrining dasturlarini amalga oshirish mexanizmi joylarda tibbiyot xodimlariga to‘liq tushuntirib berilmaganligi va jarayon tizimli nazoratga olinmaganligi sababli tarmoq rejalari noto‘g‘ri tuzilgani, ularning ijrosi talab darajasida bajarilmaganini ham tanqid qilgan.
Shundan kelib chiqib, davolash-profilaktika ishlarini talab darajasida tashkil etmagani, tibbiyot brigadalari faoliyatini tashkillashtirishda nazoratni susaytirgani, aholi reproduktiv salomatligi ko‘rsatkichlarining yomonlashgani uchun yig‘ilishda quyidagi xodimlar egallab turgan vazifasidan ozod etildi:
- Farg‘ona viloyati sog‘liqni saqlash boshqarmasi boshlig‘i birinchi o‘rinbosari A.Yusupov;
- Farg‘ona shahar tibbiyot birlashmasi boshlig‘i A.Arabov;
- Uchko‘prik tuman tibbiyot birlashmasi boshlig‘i B.Oripov;
- O‘zbekiston tibbiyot birlashmasi boshlig‘i X.Qurbonov;
- Xiva tuman tibbiyot birlashmasi boshlig‘ining onalik va bolalik masalalari bo‘yicha o‘rinbosari M.Jumaniyozova;
- Hazorasp tuman tibbiyot birlashmasi rahbari o‘rinbosari A.Ibodullayev;
- Xorazm viloyati Tez tibbiy yordam markazi direktori U. Matyoqubov;
- RShTIYoM Xorazm filiali direktori o‘rinbosarlari B.Yusupova va B.Masharipov.
Shuningdek, yig‘ilishda «Qishloq shifokori» dasturi ijrosi ham atroflicha ko‘rib chiqildi. Bu dasturni bajarishda yo‘l qo‘ygan sustkashligi uchun:
Qoraqalpog‘iston Respublikasi sog‘liqni saqlash vazirining birinchi o‘rinbosari, Sirdaryo, Navoiy, Jizzax, Xorazm, Toshkent viloyatlari sog‘liqni saqlash boshqarmalari boshliqlarining birinchi o‘rinbosarlariga (Q.Kamalov, Yu.Mirxonov, A.Yorqulov, I.Xolmurzayev, U.Abdullayev, J.Asatullayev) hayfsan intizomiy jazo chorasi qo‘llandi.
Hay’at yig‘ilishida tez tibbiy yordam xizmatidagi mavjud muammolar ham atroflicha muhokama qilindi.
Tahlillar asnosida prezident qarorida belgilangan vazifalar ijrosi doirasida kamchiliklarga yo‘l qo‘yilgani, bu borada yetarli choralar ko‘rmagani uchun:
- Respublika tez tibbiy yordam markazi Samarqand viloyati filiali rahbari D.Tog‘ayev egallab turgan lavozimidan ozod qilindi.
- Respublika tez tibbiy yordam markazi rahbari A.Gafurovga hayfsan intizomiy chorasi qo‘llandi.
Tanqidiy-tahliliy ruhda davom etayotgan yig‘ilishda joriy yilning birinchi yarmida sog‘liqni saqlash tashkilotlariga kelib tushgan murojaatlar ijrosi tahlil qilindi.
«Prezidentimiz ta’kidlaganidek, bizning amalga oshirgan ishlarimizga aholi baho beradi. Xalqimizning bahosi esa tibbiyot tizimiga bo‘layotgan murojaatlarda o‘z aksini topmoqda. Ular biz uchun ko‘zgudir», deydi vazir.
Sog‘liqni saqlash vazirligiga 2023 yilning 6 oyi davomida jami 39 376 ta murojaat kelib tushgan bo‘lib, 2022 yilning mos davriga nisbatan 5 000 taga yoki 12 foizga kamaygan. Shunga qaramay, hududlar kesimida aholi murojaatlari bilan ishlashda sustkashlikka yo‘l qo‘ygan mas’ullar aniqlandi. Ana shularni inobatga olgan holda:
- Surxondaryo viloyati sog‘liqni saqlash boshqarmasi boshlig‘ining birinchi o‘rinbosari U.Bo‘riyev, Qashqadaryo viloyati sog‘liqni saqlash boshqarmasi boshlig‘ining birinchi o‘rinbosari Sh.Gapparov, G‘uzor tuman tibbiyot birlashmasi boshlig‘i D.Shaymardonov, Quva tuman tibbiyot birlashmasi N.Mirzamatov, shuningdek, Respublika tez tibbiy yordam markazi Qashqadaryo viloyati filiali rahbari A.Aliyevga va Sirdaryo viloyati filiali rahbari D.Hamraliyevga hayfsan intizomiy jazo chorasi qo‘llandi.
Hay’at yig‘ilishida onalar va bolalar salomatligini ta’minlash borasidagi vazifalar ijrosi bo‘yicha sustkashlikka yo‘l qo‘ygani uchun:
- Farg‘ona viloyati sog‘liqni saqlash boshqarmasi boshlig‘ining onalik va bolalik masalalari bo‘yicha o‘rinbosari A.Abdurazaqov, viloyatning Qo‘shtepa (N.Abdullayeva), Dang‘ara (O.Qurbonova) hamda Namangan viloyatining Uchqo‘rg‘on (J.Rahmonaliyeva) tumanlari tibbiyot birlashmalari tug‘uruq bo‘limlari mudirlari, Xorazm viloyati bosh ginekologi S.Jumaniyozova va viloyat Perinatal markazi direktori o‘rinbosari Sh.Sattarov egallab turgan lavozimidan ozod etildi.
- Shuningdek, Qoraqalpog‘iston Respublikasi sog‘liqni saqlash vazirining onalik va bolalik masalalari bo‘yicha o‘rinbosari (A. Asqarov), Andijon (G.Qayumova), Jizzax (G.Haydarova), Navoiy (O.A’zamova), Sirdaryo (F.Mavlanov), Surxondaryo (A. Abdullayev) viloyatlari sog‘liqni saqlash boshqarmalari boshliqlarining onalik va bolalik masalalari bo‘yicha o‘rinbosarlariga hayfsan intizomiy jazo chorasi qo‘llandi.
Yig‘ilishda o‘z vazifasiga yetarli darajada mas’uliyat bilan yondashmagani uchun:
- Namangan viloyati Yangi Namangan (Z. Mamajonova), Yangiqo‘rg‘on (L. Ahmedova) va Chust tuman (K. Ahmadjonov) tibbiyot birlashmalari boshliqlariga o‘rtacha oylik ish xaqining 30 foizi miqdorida jarima qo‘llandi;
- Rishton tuman tibbiyot birlashmasi boshlig‘i A. Usmonov egallab turgan lavozimidan ozod etildi.
Shuningdek, Surxondaryo viloyati sog‘liqni saqlash boshqarmasi boshlig‘i K. Abduvohitovga hayfsan intizomiy jazo chorasi qo‘llandi.
Tanqidiy va tahliliy ruhda o‘tgan Hay’at yig‘ilishi yakunida mas’ullar sohani rivojlantirish bo‘yicha qator taklif va mulohazalarni o‘rtaga tashladi.
