16:01 / 03.10.2020
13960
Qirg‘iziston prezidenti aholini saylovda o‘z ovozlarini sotmaslikka chaqirdi

Qirg‘iziston prezidenti hozirda saylov natijalarini oldindan aytish qiyin deb hisoblaydi.

Foto: kabar.kg

Qirg‘iziston prezidenti Sooronbay Jeenbekov mamlakat fuqarolarini 4 oktyabrda bo‘lib o‘tadigan parlament saylovida o‘z ovozlarini sotmaslikka chaqirdi. U Qirg‘izistonning "Birinchi radio" radiosi efirida ana shunday murojaat bilan chiqdi.

"Bugungi kunda meni va Qirg‘iziston kelajagi uchun qayg‘urayotgan har bir fuqaroni eng tashvishlantirayotgan yagona muammo – bu saylovchilarning sotib olinishi. Ertaga ovoz berish kuni va men o‘z ovozlaringizni sotmaslikka chaqiraman. O‘zi, farzandlari, davlati kelajagi to‘g‘risida qayg‘uradigan inson hech qachon bunday qilmaydi", - dedi u.

 Uning so‘zlariga ko‘ra, o‘z ovozini sotgan odam "farzandlari. Davlat, o‘zining kelajagiga zarba bergan bo‘ladi".

Qirg‘iziston prezidenti apparati xodimlari bo‘lajak saylovga tayyorgarlik jarayoniga bevosita aralashmadi, dedi Jeenbekov.

Uning qayd etishicha, deputatlarning aksariyati "qaytadan nomzodini qo‘ygan". Qirg‘iziston prezidenti hozirda saylov natijalarini oldindan aytish qiyin deb hisoblaydi.

"Bo‘lajak saylov natijalarini oldindan aniq aytishning imkoni yo‘q. Saylov poygasida favoritlar bo‘ladi, ammo kim g‘olib chiqishini oldindan bilish qiyin. Ertaga bilamiz", - deb ta'kidladi Jeenbekov.

 Qirg‘izistonda bo‘lib o‘tadigan parlament saylovida 120 o‘rin uchun 16 partiya kurash olib boradi.

Mavzu
Qirg‘izistonda hukumat almashinuvi
Qirg‘izistonda parlament saylovlari natijalaridan norozi bo‘lgan muxolif partiyalar inqilob amalga oshirishdi.
Barchasi
Top