Turli soha vakillari davlat mukofotlari bilan taqdirlandi. Ko‘ksaroydagi tadbir taassurotlari

28 dekabr kuni Ko‘ksaroyda mukofotlarni topshirish marosimi bo‘lib o‘tdi. Unda turli soha vakillari ishtirok etdi. Mukofotlar murakkab yilda fidoyilik ko‘rsatgan yurtdoshlar mehnatining e'tirofi va sarhisobi ham bo‘ldi.

Prezident Shavkat Mirziyoyev ishtirokidagi tadbirlarning aksarida davlat rahbari muhim masalalar muhokamasiga vaqt ajratadi. Galdagi tadbir ham shunday bo‘ldi; prezident rasmiy nutq va taqdirlashlar oldidan bugungi vaziyat, yakunlanayotgan yil va tadbir ishtirokchilariga tushgan mas'uliyat haqida so‘zladi.

«Sinovlar juda ko‘p bo‘ldi, biz ulardan tinmay mehnat qilib mardonavor o‘tdik va g‘alaba qildik. Sizlarni ana shu g‘alaba bilan tabriklayman. Pandemiyadan qudratli bo‘lib chiqamiz degandim, mana bugun shu kunlarga yetib keldik, ko‘z tegmasin.

Shifokorlarga ko‘rsatgan qahramonliklari uchun ta'zim qilaman. Qurolli Kuchlar, Milliy gvardiya, Ichki ishlar, Favqulodda vaziyatlar vazirligi mard va jasur xodimlarining xizmatlarini alohida qadrlaymiz», – dedi prezident.

Mukofotlanganlar orasida tibbiyot xodimlari ko‘pchilikni tashkil qildi. Jami 86 kishidan 18 nafari – tibbiyot sohasi vakillari edi. Umuman, yil davomida sohaning 375 nafar xodimi davlat mukofotlari bilan taqdirlandi.

Davlat rahbari yakunlanayotgan yil bo‘yicha ham o‘z fikrlarini bildirdi:

«Juda murakkab yil bo‘ldi: pandemiya, Olot va Qorako‘ldagi ofat, Sardoba voqeasi, ko‘pchilikni yo‘qotdik... Kun emas, soat sanab kutyapman, mana shu yilni eson omon kuzatib olaylik, deb. Lekin shunga qaramay o‘tayotgan yil bo‘yicha noshukrlik qilmaylik. Biz bir-birimizning qadrimizga yetishni o‘rgandik, hayotga boshqacha ko‘z bilan qaray boshladik», – dedi Shavkat Mirziyoyev.

Rasmiy taqdirlash marosimida prezident har bir soha vakili – mukofot egalari bilan bittalab suhbatlashdi; suhbatlar eshitilmagan bo‘lsa-da, davlat rahbari ularni yangi marralarga ruhlantirganini sezish qiyin emasdi.

Tadbir yakunida taqdirlanganlarning taassurotlari bilan qiziqdik.

Gavhar Zokirova, O‘zbekiston xalq artisti:

— Bugun Abdulla Avloniy, Mahmudxo‘ja Behbudiy, Munavvar qori Abdurashidxonovning avlodlariga «Buyuk xizmatlari uchun» ordeni topshirildi. Bu uch oila uchun bugun unutilmas kun bo‘ldi.

O‘zingiz uchun orden olishingiz bilan bobongiz uchun orden olishingizni umuman taqqoslab bo‘lmaydi. Bu uch inson birgalikda ishlagan. «Padarkush» pesasini Behbudiy yozgan, Abdulla Avloniy shu pesada rol ijro etgan, Munavvar qori esa sahna ochilishidan oldin Toshkentda ikki mingdan ortiq yig‘ilgan odamlarning qarshisiga chiqib: «Teatr – o‘yin yoki marxarabozlik emas. Teatr – oynavand uykim, kirgan har bir kimsa o‘z husn-u qabihini ko‘ra olur», deb aytgan.

Ushbu uch odam xalqining savodini oshirish uchun, xalqining ko‘zini ochish uchun, farovon hayotga yo‘naltirish uchun xizmat qilishdi. Ziyoli inson mana shunday bo‘ladi. Doimo o‘z ustida ishlaydi va yillar o‘tib, uning avlodlari g‘ururlanib, uning uchun ordenlar olishadi.

Shahnoza Soatova, bloger, «Shuhrat» medali sohibi:

— Juda ham xursandman, sababi, men – shaxsan davlat rahbarining qo‘lidan davlat mukofotini olgan birinchi blogerman.

Bu mukofotning o‘z ramziy ma'nosi ham bor. Bu – bugungi kunda axborot maydonida o‘zining to‘g‘ri so‘zini betahrir, vijdonan aytayotganlar uchun rag‘bat, ularning so‘ziga e'tibor borligini anglatadi va bu bizga o‘ziga yarasha qo‘shimcha jur'at beradi.

G‘ulomjon Yoqubov, O‘zbekiston xalq artisti, «Mehnat shuhrati» ordeni sohibi:

— San'atkorlarning butun ishlari vatan uchun xizmat qilishdan iborat. Yangi O‘zbekistonimizning gullab-yashnashiga san'at orqali xizmat qilish bizning burchimiz. Bu mukofot meni yashartirdi, endi yanada ko‘proq xizmat qilaman. Har bir xonadonda qo‘shiq yangrasin, chaqaloqlarning ovozlari yangrasin, yurtimizga ko‘z tegmasin.

Masturaxon Sayfitdinova, O‘zbekistonda xizmat ko‘rsatgan qishloq xo‘jaligi xodimi:

— Ushbu berilgan faxriy unvon nafaqat menga, balki menga o‘xshagan barcha qishloq ayollariga berilgan unvondir. Biz bundan ruhlangan holda kuchimizga kuch, g‘ayratimizga g‘ayrat qo‘shamiz. 2021 yil barchamizga barokatli yil bo‘lsin. Biz qishloq xo‘jaligi xodimlari xalqimizning dasturxonini to‘kin-sochin qilish uchun doimo xizmatga tayyormiz.

Abror Zohidov
Tasvirchi – Nuriddin Nursaidov