21:51 / 12.02.2021
54230
Mariya Zaxarova O‘zbekistondagi rus tili bilan bog‘liq vaziyat bo‘yicha munosabat bildirdi

Rossiya tashqi ishlar vazirligi rasmiy vakili Mariya Zaxarova O‘zbekistondagi rus tili bilan bog‘liq vaziyatga o‘z munosabatini bildirdi.

Foto: Rossiya TIV

11 fevral kuni Rossiya Tashqi ishlar vazirligida o‘tkazilgan brifingda vazirlikning rasmiy vakili Mariya Zaxarova O‘zbekiston hukumati tomonidan qabul qilingan «Davlat tili to‘g‘risida»gi qonun va o‘zbek tilining mavqeyini mustahkamlash bo‘yicha olib borilayotgan davlat siyosati haqida fikr bildirdi.

«27 yanvar kuni «O‘zbekiston Respublikasining davlat tili to‘g‘risida qonunga o‘zgartish va qo‘shimchalar kiritish to‘g‘risida»gi qonun loyihasi birinchi o‘qilishdayoq maqullandi. Unda boshqa tillarning maqomi (respublikada 100 ga yaqin etnik guruh yashaydi) va til asosida kamsitishga yo‘l qo‘yilmasligi to‘g‘risidagi qoidalar aks etganini ta'kidlaymiz», dedi u.

Mariya Zaxarova Rossiya hukumati O‘zbekistonda rus tilini mustahkamlashga qaratilgan qator qo‘shma ta'lim loyihalarini amalga oshirayotganiga urg‘u bergan.

«Tarqalishi va ijtimoiy ahamiyati jihatidan rus tili davlat tilidan keyin ikkinchi o‘rinda turadi va o‘zbek o‘rta maktablarida o‘qish uchun majburiy til hisoblanadi. Hamkorlikni rivojlantirishda muhim qadam sifatida, biz 2020 yil oktyabr oyida respublika rahbariyati tomonidan Toshkentda Rossiya davlat pedagogika universitetining filialini ochish to‘g‘risida qabul qilingan qarorni ko‘rsatishimiz mumkin. Biz bu yerda bakalavrlar va magistrlarni tayyorlash bilan bir qatorda, o‘qituvchilarni kasbiy qayta tayyorlash bilan ham shug‘ullanishni rejalashtiryapmiz. Bugungi kunda O‘zbekistondagi oliy o‘quv yurtlarida mingga yaqin vakillarimiz ishlaydi», deya ta'kidlagan u.

Tashqi ishlar vazirligi vakili 2020 yil oktyabr oyida Alisher Usmonovning «San'at, fan, sport» xayriya jamg‘armasi ko‘magida tashkil etilishi rejalashtirilgan A.I.Gersen nomidagi pedagogika universiteti loyihasini eslab o‘tgan. Loyihadan maqsad O‘zbekistonda rus tili va rus tilidagi umumiy ta'lim fanlarini o‘qitish sifatini oshirish ekanligini ma'lum qilgan.

«2020-2030 yillarda respublikaga mingga yaqin rus mutaxassislarini jo‘natish rejalashtirilgan. Ular O‘zbekistonda xalq ta'lim tizimidagi 14ta hududiy markazlar va 10 mingga yaqin maktablarda pedagogik kadrlarning malakasini oshirish va qayta tayyorlash bilan shug‘ullanadi», deya fikrini yakunlagan Rossiya TIV vakili.

Eslatib o‘tamiz, 2023 yil 1 yanvardan boshlab barcha tashkilotlarda ish yuritish hujjatlari va boshqa hujjatlarni lotin yozuviga asoslangan o‘zbek alifbosida ishlab chiqish, qabul qilish va e'lon qilish amaliyoti to‘liq joriy qilinishi ma'lum qilingandi.

2020 yilning mayida ham Mariya Zaxarova O‘zbekistonda davlat tilida ish yuritishni ta'minlamaganlik uchun mansabdor shaxslarga javobgarlik belgilovchi qonun loyihasi bo‘yicha munosabat bildirgandi.

«Biz ushbu qonun loyihasi bo‘yicha OAVda davom etayotgan munozaralarga e'tibor qaratdik. Shunday taassurot uyg‘onyaptiki, hozircha ushbu qonun loyihasi tarafdorlari yaqqol ozchilikni tashkil etadi. Bildirilayotgan fikrlarning aksariyati rus tilining rasmiy muloqotda saqlanib qolishi munosabatlarimizning tarixiy ruhi va zamonaviy sifatiga, eng asosiysi – ko‘pincha Rossiyada o‘qish yoki ishlash uchun tanlov qilayotgan ko‘p sonli O‘zbekiston fuqarolari manfaatlariga to‘la mos kelishini ko‘rsatmoqda», degandi u.

O‘zbekiston Tashqi ishlar vazirligi uning fikrlariga quyidagicha izoh bildirgandi: «Davlat tilini tartibga soluvchi sohaga bog‘liq masalalar davlatning mutlaq ichki siyosatiga daxldor bo‘lib, har qanday aralashuv aslo maqbul emas».

Top