14:25 / 18.07.2021
2431
Britaniya sog‘liqni saqlash vazirida qariyalar uyiga tashrifidan keyin koronavirus aniqlandi
Foto: EPA

Britaniya sog‘liqni saqlash vaziri Sajid Javid koronavirus yuqtirib oldi. Javid virusga qarshi to‘liq emlangani sababli kasallikni yengil o‘tkazayotganini ma'lum qilgan.

“Bugun ertalab menda koronavirus aniqlandi. Men takroriy PsR-test natijalarini kutmoqdaman. Emlanganim sababli kasallikni yengil o‘tkazyapman. Iltimos, hali vaksina olmagan bo‘lsangiz, uni olish uchun murojaat qiling”, deb yozgan Britaniya sog‘liqni saqlash vaziri Twitter’da.

Javidda koronavirus alomatlari u London janubidagi qariyalar uyida bo‘lgandan 3 kun o‘tib aniqlangan. Britaniya OAVning ta'kidlashicha, Javid, shuningdek, 16 iyulda bosh vazir Boris Jonson bilan uchrashgan.

Britaniya sog‘liqni saqlash vaziri 17 mart kuni AstraZeneca vaksinasining birinchi dozasi, 16 may kuni esa ikkinchi dozasi bilan emlangan. Vaksina virusning oldini olishda 100 foiz samarador bo‘lmasa-da, to‘liq emlangan kishilar koronavirus yuqtirib olganda katta ehtimollik bilan jiddiy alomatlar his qilmaydilar.

Mavzu
Koronavirus
2019 yilning dekabr oyi oxirida Xitoyning Uxan shahrida noma'lum virus tarqala boshladi. Bu virus havo orqali odamdan odamga yuqadi va o‘limga olib keladi.
Barchasi
Top