Navbatda turgan xaridorlarga avtomobili yetkazib beriladigan aniq sana ko‘rsatilgan xabarnoma yo‘llanadi

Prezident Shavkat Mirziyoyev 14 fevral kuni mashinasozlik sanoatidagi ustuvor vazifalar muhokamasi yuzasidan yig‘ilish o‘tkazdi.

O‘zbekistonda elektromobil tarmog‘ini rivojlantirish strategiyasi ishlab chiqiladi.

«Jahonda elektromobillar ishlab chiqarish jadal rivojlanib, avtomobil bozorida salmoqli o‘rin egallamoqda. Biz ham bu sohada ortda qolmasligimiz uchun amaliy ishlarni hozirdan boshlashimiz kerak», deydi prezident.

Qayd etilishicha, mutasaddilarga uch oy muddatda elektromobil tarmog‘ini rivojlantirish strategiyasini kiritish topshirilgan. Bunda:

• elektromobillar uchun butlovchi qism va materiallarni mahalliylashtirish dasturini;
• elektromobillar uchun texnik talab va zamonaviy standartlarni ishlab chiqish vazifasi qo‘yilgan.

Shuningdek, yil yakuniga qadar xorijiy kompaniyalar bilan muzokaralarni yakunlab, strategik hamkor bilan loyihani boshlash yuzasidan ko‘rsatma berilgan.

Yig‘ilishda qishloq xo‘jaligi mashinasozligi klasterini tashkil etish bo‘yicha barcha masalalar hal qilib berilgani va bunga budjetdan 100 milliard so‘m mablag‘ ajratilgani ko‘rsatib o‘tilgan.

Soha rahbarlari oldiga 2022 yilda qishloq xo‘jaligi mashinasozligida:

• qishloq xo‘jaligi texnikasi tannarxini 12 foizga kamaytirish;
• ishlab chiqarishni 2 barobarga oshirish;
• eksportni 15 million dollarga yetkazish vazifasi qo‘yilgan.

Prezident avtomobil uchun navbatlar mavzusiga to‘xtalib, hozirgi kunda navbatda turgan har bir buyurtmachiga UzAuto Motors kompaniyasi tomonidan avtomobil yetkazib beriladigan aniq sana ko‘rsatilgan xabarnoma yo‘llash bo‘yicha topshiriq bergan.

Ichki talabni qondirish maqsadida birinchi yarim yillikda 160 mingta, yil yakuniga qadar 275 mingta avtomobil ishlab chiqarish zarurligi qayd etildi.

Bozorda taklifni oshirib, xalqimizga tanlash imkoniyatini yaratish maqsadida import avtomobillar uchun bojxona boji stavkalarini 2 barobarga pasaytirish bo‘yicha hukumatga topshiriq berilgan.

Bundan avvalroq davlat rahbari aholi talablariga e’tibor qaratib, avtomobillar uchun oldindan to‘lov miqdorini 85 foizdan 50 foizga pasaytirish va 1 mayga qadar avtomobil sotib olishdagi navbatlarni to‘liq bartaraf etishga ko‘rsatma bergani xabar qilingandi.