21:53 / 15.03.2022
125501
O‘zbekiston xalq artisti To‘ti Yusupova vafot etdi
Foto: Instagram / @milliyteatr

O‘zbekiston xalq artisti To‘ti Yusupova 86 yoshida vafot etdi. Bu haqda O‘zbek Milliy Akademik drama teatri xabar qildi.

«Ustoz san’atkor, o‘zbek teatr va kino san’atining yirik namoyandasi, o‘zbekning atoqli va ardoqli ijodkori, o‘z ijodiy uslubiga ega aktrisa, yurtning duogo‘y onaxoni, samimiy va kamtarin inson, O‘zbekiston xalq artisti To‘tixon Yusupova tabarruk 86 yoshda bandalikni bajo keltirdi.

Allohning irodasi ekan, To‘tixon onamizning ortidan qoluvchilarga O‘zi chiroyli sabr bersin. Rahmatlining oila a’zolariga, barcha yaqinlariga ta’ziya bildiramiz. Alloh marhumaning manzil-makonini shoistai jannat qilib, oxirat saodatiga yetkazsin», deyiladi xabarda.

Ma’lumot uchun, To‘ti Yusupova 1936 yilning 10 mart kuni Samarqand viloyatida tavallud topgan. Toshkent teatr va rassomlik institutini tamomlagan. 1957 yildan o‘zbek milliy akademik drama teatrida faoliyat yuritgan. Teatr sahnasida Hafiza (Abdulla Qahhor, «Shohi so‘zana»), Sonya (A.Chexov, «Vanya tog‘a»), Qorasoch (Uyg‘un, «Shubha»), Hojar (A.Qahhor, «Tobutdan tovush»), Nuri (Oybek, «Qutlug‘ qon»), Ona (E’ Robles, «O‘limdan kuchli»), Xonzoda (Hamza, «Boy ila xizmatchi»), Shafaq (M. Karim, «Oy tutilgan tunda»), Rahima (O‘. Umarbekov, «Komissiya»), Sotti (S.Ahmad, «Kelinlar qo‘zg‘oloni»), Fotima, Zebi (O‘.Umarbekov, «Shoshma quyosh», «Qiyomat qarz»), Nodira (T.To‘la, «Nodira»), Mastura (Hamza, «Paranji sirlari») kabi turli qahramonlar obrazini yaratdi. Shuningdek, aktrisa kinoda samarali faoliyat yuritgan.

To‘ti Yusupova 1994 yilda O‘zbekiston xalq artisti unvonini olgan, 2020 yilda «Mehnat shuhrati» ordeni bilan taqdirlangan.

2015 yilda va 2021 yil yozida ham aktrisaning vafoti haqida xabarlar tarqalgan, keyin bu xabarlar tasdiqlanmagandi. Keyinroq madaniyat vaziri Ozodbek Nazarbekov To‘ti Yusupovaning holidan xabar olish uchun uning xonadoniga borgandi.

2019 yil mayida uning turmush o‘rtog‘i, aktyor va dublyaj rejissyori Mirg‘iyos Soatov 82 yoshida vafot etgandi.

Mavzuga oid
Top