22:39 / 26.03.2022
22358
Tan olinmagan Tog‘li Qorabog‘ respublikasida harbiy holat joriy etildi

Harbiy holat davrida yig‘ilishlar o‘tkazish huquqi cheklanadi, ish tashlashlar va tashkilotlar faoliyati to‘xtashiga olib keluvchi boshqa tadbirlar taqiqlanadi.

Foto: AP

Tan olinmagan Tog‘li Qorabog‘ respublikasida harbiy holat e’lon qilindi, deb xabar berdi RIA.

"Arsax (Qorabog‘ning nomlanishi – tahr.) respublikasi prezidenti Araik Arutyunyan respublika hududida e’lon qilingan harbiy holat sharoitida huquq va erkinliklarning vaqtinchalik cheklanishi to‘g‘risidagi farmonni imzoladi", - deyiladi Tog‘li Qorabog‘ respublikasi axborot markazi xabarida.

Farmonga muvofiq, yig‘ilishlar o‘tkazish huquqi cheklanadi, ish tashlashlar va tashkilotlar faoliyati to‘xtashiga olib keluvchi boshqa tadbirlar taqiqlanadi.

Bundan tashqari, "Arsax respublikasi mudofaa salohiyati va xavfsizligiga qarshi qaratilgan targ‘ibot bilan shug‘ullanayotgan tashkilotlar faoliyati to‘xtatiladi".

Tan olinmagan Tog‘li Qorabog‘ respublikasi mudofaa vazirligining xabar qilishicha, “24 mart kuni Ozarboyjon qurolli kuchlari bo‘linmalari Rossiya tinchlikparvar kuchlari javobgar bo‘lgan hududga bostirib kirgan”.  

O‘z navbatida, Ozarboyjon mudofaa vazirligi Ozarboyjon Qorabog‘dagi tutashuv chizig‘ini buzgani to‘g‘risidagi xabarlar haqiqatga to‘g‘ri kelmasligini ma’lum qildi.

Top