WikiLeaks asoschisi Buyuk Britaniyadan AQShga ekstraditsiya qilish ma’qullandi. Uni 175 yillik qamoq jazosi kutmoqda

Buyuk Britaniya ichki ishlar vaziri Priti Patel WikiLeaks asoschisi Julian Assanjning AQShga ekstraditsiya qilinishini ma’qulladi. AQShda Assanj 175 yil muddatga ozodlikdan mahrum qilinishi mumkin.

WikiLeaks ushbu qaror ustidan shikoyat qilishini bildirdi.

«Matbuot erkinligi va Britaniya demokratiyasi uchun qora kun», — deyiladi tashkilot xabarida.

Dastlab Britaniya sudi Assanj AQShdagi qat’iy rejimli qamoqxonada o‘z joniga qasd qilishi mumkinligi tufayli uni ekstraditsiya qilish mumkin emasligini bildirgandi. 

Ammo o‘tgan yil dekabrida sud AQShning apellyatsiyasini qanoatlantirdi. Sud qarorida aytilishicha, Vashington WikiLeaks asoschisini qat’iy rejimdagi qamoqxonada saqlamaslikka va’da bergan hamda sud uni aybdor deb topsa, u jazoni Avstraliyada o‘tashi mumkinligini bildirgan. 

Ichki ishlar vazirining qarori o‘n yildan ortiq vaqtdan buyon davom etayotgan sud ishi tugashini anglatmaydi va yana ko‘plab oylar davom etishi mumkin, deb yozadi Reuters. U London yuqori sudiga apellyatsiyasi berishi yoki ishni qirollik Oliy sudiga oshirishga urinib ko‘rishi mumkin. Biroq apellyatsiya rad etilsa, Assanj 28 kun ichida ekstraditsiya qilinadi.

Assanj WikiLeaks sayti asochisi bo‘lib, saytda mamlakatlar va korporatsiyalarning noqonuniy ishlari to‘g‘risidagi ma’lumotlar e’lon qilingan. Jumladan, sayt AQShning Afg‘oniston va Iroqdagi harbiy kampaniyalariga oid ma’lumotlarni joylashtirgan. AQShda Assanjga nisbatan 18ta ayblov e’lon qilingan.

AQSh prokuraturasi va G‘arb maxsus xizmatlari Assanjni davlatning xavfli dushmani deb hisoblaydi, deb yozadi Reuters.

Julian Assanj 2012-2019 yillarda Ekvadorning Londondagi elchixonasida yashiringan, ammo keyinchalik u boshpanadan mahrum etilgan va London politsiyasi Assanjni qo‘lga olgan.