AQSh haytek-kompaniyalarga 10 yil davomida Xitoyda yangi zavodlar qurishni taqiqladi

Qo‘llab-quvvatlash dasturi asosida yordam olayotgan kompaniyalarga bu mablag‘lardan Xitoyga investitsiya kiritish uchun foydalanish taqiqlanadi.

Foto: Getty Images

AQSh prezidenti Jo Bayden ma’muriyati federal moliyalashtiriladigan kompaniyalarga 10 yil davomida Xitoyda yangi zavodlar qurish taqiqlanishini bildirdi.

Ushbu taqiq yarimo‘tkazgich sanoatini rivojlantirishga qaratilgan qiymati 50 milliard dollarlik rejaning bir qismi hisoblanadi.

Amerika korporatsiyalari Xitoydagi ishlab chiqaruvchilarga qaramlikni kamaytirish uchun davlat ularni ko‘proq qo‘llab-quvvatlashini talab qilmoqda.

Ular global mikrochip tanqisligiga duch kelgan.

AQSh savdo vaziri Jina Raymondoning so‘zlariga ko‘ra, davlat qo‘llab-quvvatlash dasturi asosida yordam olayotgan kompaniyalarga bu mablag‘lardan Xitoyga investitsiya kiritish uchun foydalanish taqiqlanadi.

Avgust oyida AQSh prezidenti Jo Bayden yuqori texnologiyali ishlab chiqarish va ilmiy tadqiqotlar uchun 280 milliard dollar ajratilishi to‘g‘risidagi qonunni imzolagandi.