Rossiyada Qozog‘istonning bir qismini o‘zlashtirish taklif etildi, To‘qayev javob qaytardi

«Ukrainadagi vaziyat Qozog‘istonda ham yaqqol aks etmoqda. U yerda ruslar yashaydigan ulkan hududlar bor», dedi Rossiyaning «Komsomolskaya pravda» nashri targ‘ibotchisi. 

Shunda boshqa bir targ‘ibotchi «Ukraina ssenariysi bo‘yicha Qozog‘iston hududlarini o‘zlashtirish mumkinmi?», deb so‘radi. 

«Bu yerlarga tarixiy huquqimiz bor deb hisoblayman. Bu sanoat hududi. Bular ota-bobolarimiz qurgan shaharlar... Nega biz ularni Qozog‘istonga sovg‘a qildik?», deb javob berdi hamkasbi. 

Shundan so‘ng, prezident To‘qayev rossiyalik targ‘ibotchilarni tilga olmay, «davlat millatlararo, til va ijtimoiy sabablarga ko‘ra qo‘zg‘atiladigan barcha provokatsiyalarni qonun doirasida qat’iy bostirishini» ta’kidladi. 

«Shu bilan birga, mamlakatimizning har bir fuqarosi o‘z so‘zi va xatti-harakati uchun mas’uliyatni his qilishi kerak. Biz his-tuyg‘ularga berilmasligimiz kerak. Adovat va nafratni kun tartibiga olib chiqmaslik kerak. Bizga axborot urushlari va mafkuraviy nizolar kerak emas», dedi To‘qayev. 

Uning fikricha, targ‘ibotchilarning «Qozog‘iston bilan hech qanday aloqasi yo‘q. Ular xorijda turib jamiyatga nifoq urug‘ini sepmoqchi bo‘lyapti». 

«Biz mas’uliyatli fuqarolar sifatida radikalizm, ekstremizm va separatizmning har qanday ko‘rinishlariga qarshi turishimiz kerak. Xushmuomala, qattiqqo‘l va bir vaqtning o‘zida adolatli bo‘lish kerak», dedi u.