Yangi Google smartfonlaridan kompyuter o‘rnida foydalanish mumkin

Qurilmalar ofisdagi yengil ishlarni bajarish va multimedia fayllarini tinglash uchun ishlatilishi mumkin.

Foto: Sam Rutherford/Engadget

Google Pixel 8 va Pixel 8 Pro smartfonlarni USB-C orqali monitor va televizorlarga ulash va shaxsiy kompyuter sifatida foydalanish imkonini beruvchi DisplayPort funksiyasini qo‘llab-quvvatlaydi. Bu haqda AndroidAuthority xabar berdi.

DisplayPort rejimida Pixel 8 va Pixel 8 Pro smartfonlari USB-C orqali nafaqat video, balki audioni ham uzata oladi. AndroidAuthority ushbu funksiyadan foydalanish istiqbollari «cheksiz» ekanligini yozdi.

Google birinchi navbatda shaxsiy kompyuter o‘rniga smartfondan foydalanish imkoniyatini ko‘rib chiqmoqda. Pixel smartfonlari allaqachon klaviatura va sichqonchani qo‘llab-quvvatlaydi, shuning uchun ular ofisdagi yengil ishlarni bajarish va multimedia fayllarini tinglash uchun ishlatilishi mumkin.

Smartfondan shaxsiy kompyuter sifatida qulayroq foydalanish uchun Google ularda ish stoli rejimini joriy qilmoqchi. U Android interfeysini sichqoncha va klaviaturani boshqarish uchun moslashtirish imkonini beradi.