Toshkent shahar sudida 65 nafar bolaning o‘limiga sabab bo‘lgan “Dok-1 Maks” ishi bo‘yicha sud jarayonlari boshlandi. Ish doirasida jami 21 kishiga ayblov e’lon qilingan.
O‘zbekistonda “O‘lim siropi”, ya’ni “Dok-1 Maks” dori vositasini iste’mol qilish oqibatida 65 nafar bola halok bo‘lgani xabar qilingandi. 11 avgust kuni mazkur dori bilan bog‘liq jinoyat ishini ko‘rib chiqish bo‘yicha Toshkent shahar sudida ochiq sud jarayoni boshlandi.
Ish doirasida jami 21 kishi, jumladan, Farmatsevtika tarmog‘ini rivojlantirish agentligining sobiq rahbari, Hindiston fuqarosi, “Quramax Medikal” MChJ direktori hamda boshqalarga ayblov e’lon qilingan. Ayblanuvchilarning 16 nafari erkak va 5 nafari ayol bo‘lib, ularning 7 tasiga qamoqqa olish tarzidagi ehtiyot choralari qo‘llangan.
Sudda ayblanuvchilar va advokatlarning iltimosiga ko‘ra, ayblov xulosalari, jinoyat ishi materiallari bilan tanishish imkonini berish maqsadida tanaffus e’lon qilindi.
Sud jarayoni 16 avgustda davom ettiriladi.
