Rossiyaning to‘qqizta aviakompaniyasi O‘zbekistondan yangi reyslar uchun ruxsat so‘radi

Rossiyaning to‘qqizta aviakompaniyasi Toshkentga yangi reyslar ochishdan manfaatdorligini bildirdi. Bu haqda «Rosaviatsiya» federal havo transporti agentligi xabar berdi.

Jumladan, «Aeroflot», «UTair», «IrAero», «NordStar», «Ural Airlines», «Smartavia», «AZUR Air», «Nord Wind» va «Yakutiya» kabi bir qator Rossiya aviakompaniyalari havo qatnovlarini tashkil etish uchun ariza topshirgan.

«Aeroflot» yangi reyslar uchun 11 ta ariza taqdim etgan holda yetakchilik qilmoqda, «UTair», «IrAero», «Ural Airlines» va «Smartavia» har biri 7 tadan reys ochishni rejalashtirmoqda. «NordStar» 4 ta, «Nord Wind» 3 ta, «AZUR Air», va «Yakutiya» 2 tadan ariza topshirgan.

Sankt-Peterburg va Toshkent o‘rtasidagi reyslar uchun yettita aviakompaniya ariza bergan, ular haftasiga 2 tadan 7 tagacha reyslarni amalga oshirishni rejalashtirmoqda.

Bundan tashqari, «NordStar», «Rossiya», «Smartavia» va «Yakutiya» kabi aviakompaniyalar Krasnoyarskdan Toshkentga parvozlar uchun mos ravishda 7 ta va 2 ta ariza topshirgan.

Shuningdek, Moskva va Urganch o‘rtasidagi reyslar soni, shuningdek, Buxoroga qo‘shimcha reyslar soni ortishi kutilmoqda. Rossiya aviakompaniyalari Urganchga haftalik reyslar uchun, Buxoroga esa qo‘shimcha 5 ta reys uchun 39 ta ariza topshirgan.