AQSh elchixonasi Tojikistonda teraktlar tahdididan ogohlantirdi

AQShning Tojikistondagi elchixonasi xabar berishicha, mamlakatda terrorchilik xurujlari yuz berishi ehtimoli oshgan. Bu haqda diplomatik vakolatxona saytida aytiladi.

«Tojikistonda so‘nggi vaqtlarda terrorchilik guruhlari tomonidan hech qanday hujumlar bo‘lmagan bo‘lsa-da, tahdid saqlanib qolmoqda, bunday hujum xavfi esa so‘nggi 6-12 oy ichida oshgan bo‘lishi mumkin», - deyiladi xabarda.

Diplomatlar ma'lumotiga ko‘ra, Tojikiston hududida hujumlarni birdaniga bir necha terrorchilik tashkilotlari rejalashtirayotgan bo‘lishi mumkin. Xususan, hujum Amerika manfaatlari va AQSh elchixonasiga uyushtirilishi ehtimoli yo‘q emas.

Elchixona o‘z fuqarolarini Afg‘oniston bilan chegaraga yaqinlashmaslik va odamlar gavjum joylardan nariroq yurishni so‘ragan.