IIO xodimi qonuniy talabini bajarmaganlik uchun jarima miqdori oshiriladi

Oliy Majlis Senatining navbatdagi yalpi majlisida Ma’muriy javobgarlik to‘g‘risidagi kodeksning ayrim moddalariga o‘zgartirish kiritish haqidagi qonun ma’qullandi.

Qayd qilinishicha, so‘nggi vaqtlarda huquqbuzarlar tomonidan jamoat tartibini saqlash va xavfsizligini ta’minlash borasida xizmat olib borayotgan IIO va Milliy gvardiya xodimlarining qonuniy talablarini bajarmaslik holatlari ortgan. Xususan, 2021 yilda ichki ishlar organlari xodimining qonuniy talablarini bajarmaslik bilan bog‘liq 56474 ta huquqbuzarlik qayd etilgan bo‘lsa, 2022 yilda 88401 ta, 2023 yilda 88988 ta, 2024 yilda 85278 tasi qayd etilgan.

Shu bois, Ma’muriy javobgarlik to‘g‘risidagi kodeksga quyidagicha o‘zgarishlar kiritilishi kutilmoqda:

- IIO va Milliy gvardiya xodimining qonuniy talablarini bajarmaganligi uchun BHM 5-12 baravari miqdorida jarima (amalda 1 baravari);

- xuddi shunday huquqbuzarlik ma’muriy jazo chorasi qo‘llanganidan keyin bir yil davomida takror sodir etilgan taqdirda BHM 12-30 baravari miqdorida jarima (amalda 15 baravari) yoki 15 sutkagacha muddatga ma’muriy qamoq.

Qonun senatorlar tomonidan ma’qullanib, imzolash uchun prezidentga yuborildi.